මාතර සාන්ත තෝමස් සහ සාන්ත සර්වේෂස් විදුහල් අතර 125 වැනි ‘රුහුණු නිල් මහ සටන’ වාර්ෂික ක්‍රිකට් ගැටුම පසුගිය සති අන්තයේ මාතර උයන්වත්ත ක්‍රීඩාංගණයේදී ජය පරාජයෙන් තොරව නිමාවට පත් විය.
මේ තරගයේ පළමුව පන්දුවට පහර දුන් සාන්ත සර්වේෂස් පිලේ පළමු ඉනිම ලකුණු 169කට සීමාවූ අතර, පිළිතුරු ඉනිම ක්‍රීඩා කළ සාන්ත තෝමස් කණ්ඩායමට පළමු ඉනිම වෙනුවෙන් ලබාගත හැකි වූයේ ලකුණු 124ක් පමණි.
ලකුණු 45ක් ඉදිරියෙන් සිටිමින් දෙවැනි ඉනිම ඇරඹූ සර්වේෂස් කණ්ඩායම කඩුලු 7කට ලකුණු 218ක් ලබා සිටියදී ඉනිම අත්හිටුවූයේ ප්‍රතිවාදීන්ට ලකුණු 263ක ඉලක්කයක් දෙමිනි.
වර්ෂාවෙන් බාධා වීම හේතුවෙන් තරගය නතර කරන විට සාන්ත තෝමස් පිල කඩුලු 5ක් දැවී ලකුණු 60ක් ලබා සිටියේය. තරගයේ වැඩි වාසි සාන්ත සර්වේෂස් කණ්ඩායමට හිමිකර දෙමින් මෙවර රුහුණු නිල් මහ සටන ජය පරාජයෙන් තොරව නිමාවට පත් විය.
තරගයේ දක්ෂතම පිතිකරු ලෙස සාන්ත සර්වේෂස් විදුහලේ රවින් කවින්ත සම්මාන දිනාගත් අතර, දක්ෂතම පන්දු යවන්නා ලෙස චිරාන් චමුදිත (සර්වේෂස්) සහ දක්ෂතම පන්දු රකින්නා ලෙස විශ්ව සුපුන් (සර්වේෂස්) සම්මාන දිනා ගත්හ.
