අපල දුරු කිරීමට නිදහස් කළ පක්ෂීන් අල්ලා වෙනත් පුද්ගලයින්ගේ අපල දුරු කිරීමට මිලදී ගන්නා ලෙස පවසමින් ඉතා දුර්ලභ ගණයේ පක්ෂීන් නීති විරෝධී ලෙස අලෙවි කරමින් සිටි කාන්තාවක් පක්ෂීන් 28 දෙනෙකු සමඟ අත්අඩංගුවට ගත් බව කොට්ටාව පොලීසිය පවසයි.
මෙසේ අත්අඩංගුවට ගෙන ඇත්තේ ජා ඇළ ප්‍රදේශයේ පදිංචි 50 හැවිරිදි කාන්තාවක බව පොලීසිය පවසයි.
කොට්ටාව පොලීසියේ නිලධාරි කණ්ඩායමක් ජංගම රාජකාරියේ නිරතව සිටියදී සත්ත්ව හිංසනය ඇතිවන සේ කුඩා කූඩු දෙකක හිරකරගෙන පක්ෂීන් 28 දෙනකු සන්තකයේ තබාගෙන සිටි කන්තාවක කොට්ටාව නගර මධ්‍යයේ රැඳී සිටිනු දැක ඒ පිළිබඳව ප්‍රශ්න කිරීමේදී එම පක්ෂීන් අලෙවි කිරීම සඳහා රැඳී සිටින බවට තොරතුරු අනාවරණය වී තිබේ.
ඒ අතර දුර්ලභ ගණයේ පක්ෂීන් කිහිප දෙනෙකු ද එහි සිට ඇති අතර ඔවුන් රුපියල් 1000 සිට 2000 දක්වා මිල ගණන්වලට අලෙවි කර තිබේ.
එහෙත් එම පක්ෂීන් අලෙවි කිරීම සඳහා කිසිදු අවසරයක් නොමැති වීම නිසා ඇය සන්තකයේ තිබූ පක්ෂීන් 28 දෙනා අදාළ කාන්තාව ද සමඟ අත්අඩංගුවට ගෙන වැඩිදුර ප්‍රශ්න කිරීමේදී ජාඇළ ප්‍රදේශයේ සිට කොට්ටාව ප්‍රදේශයට පැමිණ මෙම ජාවාරම කරගෙන ගොස් ඇති බවට තොරතුරු අනාවරණය වී තිබේ.
මෙම ජාවාරම වෙනත් පුද්ගලයකු සිදුකරන අතර ඒ සඳහා දවස් පඩියට කොළඹ අවට ස්ථාන රැසක මෙසේ පක්ෂීන් සමඟ පුද්ගලයින් යොදවා ඇති බවට ද තොරතුරු අනාවරණය වී තිබේ.
පසුව කාන්තාව සන්තකයේ තිබූ පක්ෂීන් 28 දෙනා දෙහිවල සත්වෝද්‍යානයට යොමු කොට වාර්තාවක් කැඳවීමට නියමිත අතර සැකකාරිය හෝමාගම අධිකරණයට ඉදිරිපත් කිරීමට නියමිතය.
