සෙල්ල කතරගම වල්ලි විහාරස්ථානය අසල පදිංචිව සිටි පුද්ගලයෙක් පෙරේදා (06) දහවල් මුහුණ සේදීමට මැණික් ගඟේ අතු ආරකට බැස තිබූ මෙහොතක දැවැන්ත කිඹුලකුගේ ප්‍රහාරයකට ලක්ව බරපතළ තුවාල ලබා කතරගම රෝහලට ඇතුළත් කර ඇත.
මෙසේ තුවාල ලබා කතරගම රෝහලට ඇතුළත් කර ඇත්තේ නිලුපුල් කුමාර නමැති 44 හැවිරිදි එක්දරු පියෙකි.
ඔහුගේ වම් අතේ බරපතළ තුවාල සිදුව ඇති අතර මැණික් ගඟ ආශ්‍රිතව වගා කොරටුවක් කර ගෙන යන පුද්ගලයකි. කතරගම රෝහලින් වැඩිදුර ප්‍රතිකාර සඳහා හම්බන්තොට මූලික රෝහල වෙත ඔහුව යවා ඇත. මේ වන විට කතරගම මැණික් ගඟ ආශ්‍රිතව දැවැන්ත කිඹුලන් රැසක් සැරිසරන අතර පසුගිය 05 වැනිදා මැණික් ගඟේ අංක 02 පාලම අසලදී කිඹුලකු සපාකෑම මත පුද්ගලයකු කතරගම රෝහලින් ප්‍රතිකාර ලබා පිටව ගොස් ඇත. වසර ගණනාවකින් කිඹුල්ලු ඇල්ලීමක් කර නොමැතිකම මත මේ වන විට කිඹුලන් 20කට වැඩි ප්‍රමාණයක් කතරගම මැණික් ගඟ තුළ සැරිසරමින් සිටිති.
වනජීවි නිලධාරීන් 2015දී කිඹුලන් ඇල්ලීම සිදු කළ අතර මේ වන විට කිඹුලන් ඇල්ලීම සිදුනොවීම මත වන්දනා බැතිමතුන්ගේ මෙන්ම කතරගම ජනයාද මැණික් ගඟ පරිහරණය කිරීම ඉතාමත් අනතුරුදායක තත්ත්වයකට පැමිණ ඇත.
