රටටම ඇසෙන්නට අඬබෙර ගසා මත්වතුර ද පෙරටුකර ගනිමින් උපන් දින සාද පවත්වන නූතන යුගයක, තම ජන්ම දිනය ඉතා ආදර්ශවත් අයුරින් සැමරූ පුද්ගලයකු පිළිබඳ පුවතක් ඉංගිරිය ප්‍රදේශයෙන් වාර්තා විය.
නමින් එස්.ඒ.ඒ. විජේකුමාර නම් ඔහුගේ පදිංචිය ඉංගිරිය, කිරිගල ප්‍රදේශයේ වන අතර, පසුගියදා යෙදී තිබුණු උපන් දිනය සැමරීම වෙනුවෙන් ඔහු විසින් ඉංගිරිය රෝහලට ලක්ෂ 30කට ආසන්න භාණ්ඩ තොගයක් ලබාදී තිබිණි.
හදිසි අනතුරු ඒකක සඳහා පාවිච්චි කරන ඇඳක්, සියලු පහසුකම් සහිත අති නවීන රෝද පුටුවක්, ඇඳ අසලටම රැගෙන ගොස් පාවිච්චි කළ හැකි සුඛෝපභෝගී කොමඩ් වර්ගයේ විශේෂ පුටුවක්, අත් වාරු යුගලක් හා ඉගෙනුම ලබන සිසුන් සඳහා පෙරහුරුවලට භාවිත කරන මානව ශරීර අනුරුවක්, නොයෙක් ප්‍රමාණයේ පැම්පස්, සර්ජිකල්, අත් ආවරණ සහ වෙට් ටිෂූ විශාල ප්‍රමාණයක් ඇතුළු භාණ්ඩ රාශියක් මේ අතර විය.
මින්පෙර යෙදී තිබුණු විජේකුමාර මහතාගේ බිරියගේ සහ පුතාගේ උපන් දින සැමරීම වෙනුවෙන්ද ඔහු විසින් මේ අයුරින්ම ඉංගිරිය රෝහලට විශාල වටිනාකමකින් යුත් භාණ්ඩ තොගයක් ලබාදී තිබීම විශේෂත්වයක් වන අතර, ග්‍රාමීය පෙදෙසක පිහිටි රෝහලක් වන ඉංගිරිය රෝහලට මෙලෙස ඔහු විසින් සිදු කළ පරිත්‍යාග සියලු දෙනාගේම පැසසුමට ලක්විය.
