‘කඳුකර දසකය’ වැඩසටහන යටතේ පසුගිය රජයෙන් රුපියල් කෝටි එකහමාරක වියදමින් නාඋල – ශ්‍රී නාග ආදර්ශ ප්‍රාථමික විදුහලේ ඉදිවූ ගොඩනැඟිල්ලක් කිසිදු දේශපාලනඥයකු නොමැතිව මහ සඟරුවනට දන් පුදා විවෘත කළ පුවතක් නාඋලින් වාර්තා වෙයි.
ප්‍රදේශයේ සිංහල, දමිළ සහ මුස්ලිම් මවුපියන් විසින් දන් සකසා දරුවන් 710 දෙනෙකු සම්බන්ධ වී විචිත්‍රවත් පෙරහරකින් මහ සඟරුවන වඩම්මවා දන් පැන් පිළිගන්වමින් ගොඩනැඟිල්ල විවෘත කිරිම විශේෂත්වයක් විය.
නාඋල ශ්‍රී නාග ආදර්ශ ප්‍රථමික විද්‍යාලයේ විදුහල්පති මහින්ද හෙට්ටිආරච්චි මහතාගේ හා ආචාර්ය මණ්ඩලයේ මඟ පෙන්වීම යටතේ මෙම වැඩසටහන සංවිධාන කර තිබිණි.
උත්සවයට සමගාමීව විෂය සමගාමී වැඩසටහන් අතරට ඇති හතර වසර පන්තියේ පෙරහර පාඩම සහ දෙක වසර පන්තියේ සාංඝික දානය පාඩම සම්බන්ධයෙන් ද අවධානය යොමුකරමින් දරුවන්ට අත්දැකීම් ලබාදීම අරමුණු කර ගනිමින් මෙම වැඩසටහන ගොඩනැඟිල්ල විවෘත කිරීමට සමගාමීව ක්‍රියාත්මක කළ බව විදුහල්පති මහින්ද හෙට්ටිආරච්චි මහතා පවසා සිටියේය.
මෙම අවස්ථාව සඳහා අරංගල සිරි අරහන්ත පබ්බතාරාමාධිපති, උතුරු මාතලේ ප්‍රධාන සංඝනායක පෙනලබොඩ සෝමානන්ද ස්වාමින් වහන්සේ මෙන්ම නාඋල නාතිස්ස රාජමහා විහාරාධිපති, නාඋල ශාසනාරක්ෂක බලමණ්ඩලයේ ලේකඛාධිකාරි, නාඋල ශ්‍රී දම්මානන්ද මහ පිරිවෙනේ පරිවේණාධිපති පූජ්‍යපාද බිබිලේ වජිරඥාන ස්වාමීන් වහන්සේ වරක් ප්‍රමුඛ මහා සංඝරත්නය වැඩමකරලීය.
රුපියල් කෝටි එකහමාරක වියදමින් ඉදිවූ පාසල් ගොඩනැඟිල්ල
