ප්‍රාදේශීය සභාවල තිබෙන ලොකුම ප්‍රශ්නය තමයි කසළ ප්‍රශ්නය.දැන් කොළඹ නගර සභාවේ කසළ ප්‍රශ්නයක් නැති තරම්.කසළවලින් දැන් විදුලිය නිපදවනවා.ගොහාගොඩත් කරන්න හිටියේ එවැනි වැඩ පිළිවෙළක්.නගර සභාවටත් ප්‍රාදේශීය සභාවටත් ඒක ඕනෑ වුණේ නැහැ.එක්සත් ජනරජ පෙරමුණට බලය ලබා දුන්නොත් මහවැලි ගඟට දාලා තිබෙන කුණු කන්දෙන් විදුලිය නිපදවන ව්‍යාපෘතියක් ගේන බව එක්සත් ජනරජ පෙරමුණේ නායක පාඨලි චම්පික රණවක මහතා පවසයි.
ඒ මහතා මේ බව කියා සිටියේ පළාත් පාලන මැතිවරණයට හාරිස්පතුවෙන් තරග වදින අපේක්ෂකයන් දැනුම්වත් කිරීමට හාරිස්පත්තුවේ තිත්තපජ්ජල දී පෙරේදා(05) පැවති හමුවකට සහභාගි වෙමිනි.
එහිදි වැඩිදුරටත් රණවක මහතා මෙසේද පැවසීය.
මේ මැතිවරණයට ලොකු පක්ෂ කියා දෙයක් ඉතිරි වෙලා නැහැ. ගෝඨාභය මහත්තයාට පින්සිදු වෙන්න 2022 ඇති කරපු ඒ ආර්ථික අර්බුදය නිසා මිනිස්සු ලොකු පක්ෂවලට පයින් ගැහුවා.අද ශ්‍රී ලංකා නිදහස් පක්ෂය කියලා එකක් නැහැ.එක්සත් ජාතික පක්ෂය කියා පුළුල් පක්ෂයක් නැහැ.පොඩි පක්ෂයක් තිබෙන්නේ.ශ්‍රී ලංකා පොදුජන පෙරමුණ කියන්නෙත් පොඩි පක්ෂයක්.මහින්ද රාජපක්ෂ මහත්තයලට 2020 මහ ඡන්දයේදී ලක්ෂ 70ක් ලැබුණා.ගිය පාර ලැබුණේ ලක්ෂ තුන හමාරයි.රනිල් වික්‍රමසිංහ මහත්තයලටත් ඒ වගේමයි.ඒ ඉරණම අනිවාර්යෙන්ම අනාගතේ සජබටත් හිමි වෙන බව අපට පැහැදිලියි.වෙනස් වෙන්න කැමති නැතිනම්,තරුණයන්ට තැන දෙන්න කැමති නැතිනම් ඥාතින් කරපින්නා ගෙන යනවා නම් ඒ පක්ෂවලටත් අනාගතයක් නැහැ.ඒ නිසා ඔය එක පක්ෂයකටවත් හාරිස්පත්තුවේ ඡන්ද සියයට දහයක්වත් නැහැ.හාරිස්පත්තුවේ වැඩි ඡන්දයක් ලබාගත්තේ මාලිමාව.මේ ඡන්දයේදි අලුත් විදියට හිතන අලුත් දෙයක් කරන්න පුළුවන් එක්සත් ජනරජ පෙරමුණට ඡන්දය දෙන්න.
අපේ මන්ත්‍රීවරු තනිවෙන්නේ නැහැ.විශාල පිරිසක් ඉන්නවා ඒ අයට සහාය දෙන්න.ඔබේ ඡන්දයට වටිනාකමක් දෙන්න.අපි ඔබලාගේ වැඩ ටික කර දෙනවා කියලා පොරොන්දු වෙනවා.සියලු පක්ෂවලින් ගැලවිලා ඉන්න අය මේ අලුත් පෙරමුණට එකතු වෙන්න.මෙතන රට බංකොලොත් කරපු කිසි කෙනෙක් නැහැ.
