හිටපු ජනාධිපති මහින්ද රාජපක්ෂ මහතාට මේ රට සම්බන්ධයෙන් මතවාදයක් පැවතීම හේතුවෙන් ත්‍රස්තවාදයෙන් ගැලවී, නිදහස්ව අලුත් ගමනක් යන්නට රටක් ලෙස හැකි වූ බව හිටපු පාර්ලිමේන්තු මන්ත්‍රී සංජීව එදිරිමාන්න මහතා ප්‍රකාශ කරයි.
ඒ මහතා මේ බව ප්‍රකාශ කළේ ශ්‍රී ලංකා පොදුජන පෙරමුණ පක්ෂ මූලස්ථානයේදී ඊයේ (07) පැවැති ප්‍රවෘත්ති සාකච්ඡාවට එක්වෙමිනි.
එහිදී වැඩිදුරටත් අදහස් පළ කළ ඒ මහතා මෙලෙස ද කීවේය.
“ලංකාවේ දේශපාලන ව්‍යාපාරය බලයට පැමිණෙන්නට පෙර පළ කරන ලද අදහස් සහ බලයට පැමිණි පසු ක්‍රියාත්මක කරන ප්‍රතිපත්තිමය සංකල්ප අතර යම් යම් වෙනස්කම් තිබෙන්න පුළුවන්. එය සුලභව ලංකාවේත්, ලෝකයේ අනෙක් රටවලත් සාමාන්‍යයෙන් දකින්න පුළුවන්. හැබැයි බලයට පැමිණෙන්න පෙර කියූ කතා සහ බලයට පැමිණි පසු ක්‍රියාත්මක කරන ප්‍රතිපත්ති අතර NPP ආණ්ඩුවේ තරම් පරතරයක් ලංකා ඉතිහාසයේ කිසිම ආණ්ඩුවක, කිසිම දේශපාලන ව්‍යාපාරයක දැක නෑ. මේ ආසන්න මොහොතේ ඉන්දු ශ්‍රී ලංකා සබඳතාව සම්බන්ධයෙන් මේ පාලකයන් සිටින පරස්පරය, ප්‍රතිපත්තිමය ප්‍රතිවිරෝධය ඒ තරම් පුළුල් එකක්. මේ කතා කරන්නේ විජේවීරගේ කාලයේ තිබු ඉන්දීය විරෝධයවත්, ඒ කාලයේ ජවිපෙ තිබූ පන්ති පහේ ඉන්දීය ව්‍යාප්තවාදයවත් ගැන නොවේ.
මේ අනුර කුමාර දිසානායක ජනාධිපතිවරයාගේ ආණ්ඩුව පහුගිය ජනාධිපතිවරණ වේදිකාවේ ඉන්දියාව සම්බන්ධයෙන් කතා කළේ මීට හාත්පසින් වෙනස් ප්‍රතිපත්තිමය අදහස්. දැන් මේ අත්සන් කරන සියලු ගිවිසුම් සම්බන්ධව ඔවුන්ට තිබුණේ බරපතළ විරෝධයක්. ලංකාවේ විදුලිබල සම්ප්‍රේෂණ පද්ධතිය ඉන්දියන් නැෂනල් ග්‍රිඩ් (Indian national Grid) සම්බන්ධ කිරීමට විරුද්ධව උසාවි ගියේ මේ NPP ආණ්ඩුවේ සාමාජිකයන්. අද ඒ උසාවි ගිය කෙනා තමයි මේ ආණ්ඩුවේ විදුලිබල ඇමැතිවරයා. ත්‍රිකුණාමලයේ තෙල් ටැංකි සහ තෙල් නළ පද්ධතිය සම්බන්ධයෙන් අශෝක රන්වල තමයි මහපාරේ විරෝධය ක්‍රියාත්මක කළේ. ඩිජිටල්කරණ ව්‍යාපෘතිය පිළිබඳ අනුර කුමාර දිසානායක ජනාධිපතිවරයා NPP නායකයා විදිහට මයික් පැලෙනතුරු කෑ ගැසුවා. අද ඔවුන් ඉතාම වෙනස් තැනකට ඇවිත් සිටිනවා. මේ වෙනස අපට හිතාගන්න බැරි තරම් දේශපාලන පරස්පරතාවක් ලෙස අපට පෙනෙනවා.
මේ ආණ්ඩුවේ කැබිනට් ප්‍රකාශකවරයා පාස්කුදා ප්‍රහාරය සම්බන්ධයෙන් ඉන්දියාවට පැහැදිලිව චෝදනාවක් කළා. ඒ චෝදනාව කළ මහත්තයා මෝදි අගමැතිවරයාගේ පරිවාර ඇමැති ලෙස පත්කර තිබුණා. මේ සමාජය මේ ආණ්ඩුවෙන් ප්‍රශ්න කරන්නේ ජවිපෙ අතීත ඉන්දියන් විරෝධය නොවේ, නූතන NPP ඉන්දියන් විරෝධයයි. NPP ආණ්ඩුවේ ඉන්දියානු ගනුදෙනුව අතර සම්බන්ධය. ඉන්දියාවත් සමඟ අපි අපේ ආණ්ඩු කොංග්‍රස් ආණ්ඩුත් සමඟ මන්මෝහන් සිං, නරේන්ද්‍ර මෝදි ආණ්ඩුවත් සමඟ ගනුදෙනු කළා. කොවිඩ් වසංගතය අවස්ථාවේ එවක මුදල් ඇමැති බැසිල් රාජපක්ෂ මහතා ඉන්දියාවට ගිහිල්ලා මුදල් ඉල්ලා ගත්තේ නැතිනම් ඒ අවස්ථාවේ ඒ තත්ත්වය ඉතාම ව්‍යසනකාරී තැනකට යන්න තිබුණා. ඉන්දියාවට ඒ ගෞරවය අයිතියි. ඉන්දියාව අපේ කලාපය තුළ දේශපාලනය කරන විදිහ සම්බන්ධව අපට විරෝධයක් නෑ. හැබැයි අපි ප්‍රශ්න කරන්නේ අපේ ආණ්ඩු එය මේ විදිහටම කරන්න හදද්දී මේ පිරිස වෙනස් කතාවක් කිවුවේ.
නීතිය ක්‍රියාත්මක වීම සාධාරණ විදිහට සිදු වෙනවා නම් ඒ සම්බන්ධ අපට විවේචනයක් නෑ. හැබැයි අනුර කුමාර දිසානායක මහතාගේ කණ්ඩායම යහපාලන ආණ්ඩුව ඇතිකර ගත් අවස්ථාවේත් මේ දේශපාලන දඩයම ඒ විදිහට කළා. ඒ සිද්ධි පිළිබඳව නැවතත් විමර්ශන සිදු වෙමින් තිබෙනවා. ආණ්ඩුවට යුතුකමක් තිබෙනවා මෙය දේශපාලන දඩයමක් නොවේ කියන එක සමාජය හමුවේ තහවුරු කරන්න. මෛත්‍රීපාල සිරිසේන මහතාගේ ආණ්ඩුව 2018 පෙබරවාරි මස 10 වැනිදා පළාත් පාලන ඡන්දයෙන් පරදිනවා. මේ ආණ්ඩුවත් ඉතාම නරක තැනක ඉද්දී තමයි මේ ඡන්දයට එන්නේ.”
