අමෙරිකානු ජනාධිපති ඩොනල්ඩ් ට්‍රම්ප් මහතා විසින් පනවා ඇති බද්ද ක්‍රියාත්මක වුණොත් සිංහල සහ හින්දු අවුරුද්දෙන් පසුව ඇඟලුම් කම්හල් සේවකයන්ගේ රැකියා අනතුරකට පත්වන බව විපක්ෂ නායක සජිත් ප්‍රේමදාස මහතා ප්‍රකාශ කළේය.
විපක්ෂ නායකවරයා මේ බව පැවැසුවේ පසුගියදා නාත්තණ්ඩිය ප්‍රදේශයේ පැවැති ජනහමුවකට සහභාගි වෙමිනි.
එහිදී වැඩිදුරටත් අදහස් දැක්වූ විපක්ෂ නායකවරයා මෙලෙස ද කීවේය.
“මෙරට අපනයන විශාල ප්‍රමාණයක් යොමු වන අමෙරිකා එක්සත් ජනපදය විසින් මෙරට අපනයන භාණ්ඩවලට විරුද්ධව 44%ක ප්‍රතිචාරාත්මක බද්දක් පනවා තිබෙනවා. අමෙරිකානු භාණ්ඩවලට ශ්‍රී ලංකාව විසින් සියයට අසූ අටක බද්දක් පනවා ඇති නිසා මේ බද්ද දමා තිබෙනවා. මෙරට ඇඟලුම්වලින් 40%ක් අමෙරිකාවට යවනවා. මතුවී ඇති තත්ත්වය බරපතළ නිසා මේ සම්බන්ධයෙන් රජය දැනුම්වත් කළේ දැනට මාස කිහිපයකට පෙර සිටයි. අතිවිශාල ජනවරමක් ලබමින් බලයට පත්වූ ඩොනල්ඩ් ට්‍රම්ප් මහතා අමෙරිකාවට එන භාණ්ඩවලට බදු පනවන බව පැවසූ අවස්ථාවේදී මේ පිළිබඳව පාර්ලිමේන්තුව දැනුම්වත් කළත් රජය ඒ ගැන තැකීමක් කළේ නෑ. මීට පෙර පාර්ලිමේන්තුවේදී ගැටලු ඉදිරිපත් කිරීමට අවස්ථාව තිබුණත් වත්මත් රජය යටතේ විපක්ෂයේ මන්ත්‍රීවරුන්ට කතා කිරීමට තිබූ කාලය සීමා කර තිබෙනවා. මේ බදු පැනවීම අප්‍රේල් 09 වැනි දා සිට ක්‍රියාත්මක කරනවා.
අලුත් අවුරුදු නිවාඩුවට ගෙදර යන ඇඟලුම් කම්හල් සේවක සේවිකාවන්ට අලුත් අවුරුදු නිවාඩුව අවසන් වන විට රැකියාවේ අවිනිශ්චිතභාවයක් මතු වෙනවා. කර්මාන්තශාලා කඩාවැටී රැකියා අහිමි වී, ආර්ථික වර්ධන වේගය පහළ ගොස් සමස්ත ජනතාවටම බරපතළ හානියක් සිදු වෙනවා. මෙය 2028 ණය ගෙවීමට ද විශාල බාධාවක්. 2033 ගෙවන්න තිබූ ණය 2028 ගෙවීමට තිබෙනවා. ඒ සඳහා පවත්වාගෙන යා යුතු ආර්ථික වර්ධන වේගයට මේ බදු පැනවීම මරු පහරක්. මේ ගැන ජනතාව දැනුම්වත් විය යුතුයි. රජය මේ ගැන සොයන්න මේ වන තෙක් කර ඇත්තේ කමිටුවක් පත් කිරීම වුවත් ඊට වඩා යමක් සිදු විය යුතුයි. මේ සම්බන්ධයෙන් දක්ෂ දූත පිරිසක් යවා අප රටෙන් ලබා දෙන ප්‍රතිචාරය ඉදිරිපත් කිරීමත්, ලෝකයේ අනෙකුත් රටවල් සමඟ එකතු වී පොදු වැඩසටහනක් ක්‍රියාත්මක කිරීමත් සිදු විය යුතුයි. නරේන්ද්‍ර මෝදි අගමැතිවරයා හමු වූ අවස්ථාවේ ඉන්දීය වෙළෙඳපොළට අප රටේ ඇඟලුම් ඇතුළු තවත් අපනයන භාණ්ඩවලට ප්‍රවේශ වීමට ඇති පහසුකම් පුළුල් කරන ලෙස අපි ඉල්ලා සිටියා.”
