එළැඹෙන පළාත් පාලන මැතිවරණයේදී කොළඹ මහනගර සභාව, හාරිස්පත්තුව, උඩපළාත, පන්විල, පාතදුම්බර, කුලියාපිටිය ප්‍රාදේශීය සභාව ඇතුළු පළාත් පාලන ආයතන කිහිපයකට අදාළ ඡන්ද විමසීම පැවැත්වීම අත්හිටුවන අතුරු තහනම් නියෝගයක් අභියාචනාධිකරණය ඊයේ (07)නිකුත් කළේය.
නියමිත කාල සීමාව තුළ නාමයෝජනා පත්‍ර භාර නොදීම හේතුවෙන් එම නාමයෝජනා ප්‍රතික්ෂේප කිරීමට එරෙහිව දේශපාලන පක්ෂ සහ ස්වාධීන කණ්ඩායම් කිහිපයක් විසින් ඉදිරිපත් කළ රිට් පෙත්සම් කිහිපයක් විභාගයට ගැනීමට අවසර ලබා දෙමින් මෙම නියෝගය නිකුත් කරන ලදි.
අදාළ පෙත්සම් විභාගය මැයි මස 16 වැනිදා සිදු කිරීමට නියම කෙරිණ.
අදාළ පෙත්සම් සම්බන්ධයෙන් වගඋත්තරකාර පාර්ශ්වයන්ට නොතීසි නිකුත් කරමින් අභියාචනාධිකරණ වැඩබලන සභාපති විනිසුරු ලෆාර් තාහීර් මහතා සහ අභියාචනාධිකරණ විනිසුරු ප්‍රියන්ත ප්‍රනාන්දු යන මහත්වරුන්ගෙන් සමන්විත විනිසුරු මඬුල්ලක් විසින් මෙම නියෝගය නිකුත් කරන ලදි.
අදාළ පෙත්සම් සම්බන්ධයෙන් වන විරෝධතා මැයි මස 05 වැනිදා හෝ ඊට පෙර ගොනු කරන ලෙස නියම කෙරිණ.
ප්‍රතිවිරෝධතා මැයි මස 07 වැනිදා හෝ ඊට පෙර ගොනු කරන ලෙස නියම කෙරිණ.
මේ අතර නාමයෝජනා පත්‍ර ප්‍රතික්ෂේප කිරීමට එරෙහිව ඊයේ (07)ගොනු කළ තවත් රිට් පෙත්සම් 53ක් ද අධිකරණය හමුවේ කැඳවන ලදි.
සමාදාන විනිශ්චයකරුවකු විසින් සහතික කර ඇති උප්පැන්න සහතික සමඟ භාර දුන් නාමයෝජනා පත්‍ර පිළිගන්නා ලෙස අභියාචනාධිකරණය විසින් මීට පෙර තීන්දුවක් ලබා දුන්නද එවැනි නාමයෝජනා පත්‍ර භාරගත නොහැකි බවට ශ්‍රේෂ්ඨාධිකරණය විසින් පසුගියදා නියෝගයක් ලබාදී ඇති බවට එහිදී නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් මනෝහාර ජයසිංහ මහතා සඳහන් කළේය.
එබැවින් ඒ සම්බන්ධයෙන් ලබා දී ඇති නියෝගය වෙනස් කරන ලෙස ඔහු අධිකරණයෙන් ඉල්ලා සිටියේය.
එසේම මෙම පෙත්සම් ඉවත දමන ලෙස ඔහු අධිකරණයෙන් ඉල්ලා සිටියේ ය. එහිදී පෙත්සම්කාර පාර්ශ්වය වෙනුවෙන් පෙනී සිටි ජනාධිපති නීතිඥ ෆයිසර් මුස්තාපා මහතා සඳහන් කළේ මෙම ශ්‍රේෂ්ඨාධිකරණ නියෝගය දී ඇත්තේ මූලික අයිතිවාසිකම් පෙත්සම් කිහිපයක් විභාගයට ගැනීමට අවසර ලබා දෙමින් බවය.
එය අවසන් නියෝගයක් නොවන අතර එම පෙත්සම්වලට අදාළ අවසන් නියෝගයේදී එය වෙනස් විය හැකි බව ද ජනාධිපති නීතිඥවරයා සඳහන් කළේය.
එබැවින් අදාළ නියෝගය මත අභියාචනාධිකරණය විසින් මීට පෙර දෙන ලද නියෝග වෙනස් කළ යුතු නැති බව ද ඒ මහතා සඳහන් කළේය.
ඉදිරිපත් වූ කරුණු සලකා බැලූ විනිසුරු මඬුල්ල මෙම පෙත්සම් 53 සම්බන්ධයෙන් කරුණු තහවුරු කිරීම සඳහා අවසර දෙන්නේද යන නියෝගය ලබන 10 වැනිදා ප්‍රකාශයට පත් කිරීමට තීරණය කළේය.
එසේම අවසන් පිටුවට පක්ෂයේ මහලේකම්වරයා අත්සන් නොකිරීම හේතුවෙන් නාමයෝජනා පත්‍රය භාර ගැනීම ප්‍රතික්ෂේප කිරීමට එරෙහිව ගොනු කර ඇති පෙත්සම නිෂ්ප්‍රභ කිරීමට අධිකරණය තීරණය කළේය.
