බේකරි නිෂ්පාදන ආයතනයක් විසින් මස් මාංශ සමඟ ගබඩා කර තිබූ ලක්ෂ 20ක බටර් කිලෝ 1130ක ප්‍රමාණයක් හෙට දින (09) වළ දමා විනාශ කිරීමට මාළිගාකන්ද මහේස්ත්‍රාත් ලෝචනී අබේවික්‍රම වීරසිංහ මහත්මිය නියෝග කළාය.
සිද්ධිය සම්බන්ධයෙන් එම ආයතනයට රුපියල් 7500ක දඩ මුදලක්ද අධිකරණය නියම කළේය.තවද මෙම ආයතනය සඳහා මහජන සෞඛ්‍ය පරීක්ෂක නිලධාරීන් විසින් ගොනුකර තිබූ චෝදනා 9ක් සඳහා රුපියල් 55 000ක දඩ මුදලක්ද අධිකරණය නියම කළේය. කොළඹ මහජන සෞඛ්‍ය පරීක්ෂක දිසා අංක 2A කාර්යාලයේ නිලධාරීන් විසින් කොටහේනේ පිහිටි සැකකටයුතු බේකරි නිෂ්පාදන ආයතනයේ වැටලීමක් කර ඇති අතර, එහිදී මෙම බටර් තොගය හමුවී ඇත. එම බටර් තොගය එම අවස්ථාවේදී මස් මාංශ සමඟ එක්කොට ගබඩා කර තිබූ බවත් කිරි ආශ්‍රිත නිෂ්පාදන සමඟ මාංශමය ආහාර ගබඩා කිරීම හේතුවෙන් එම බටර් තොගය මිනිස් පරිභෝජනයට නුසුදුසු බවත් මහජන සෞඛ්‍ය පරීක්ෂක නිලධාරියා අධිකරණය හමුවේ කරුණු වාර්තා කළේය.
සිද්ධිය සම්බන්ධයෙන් අදාළ ආයතනය අධිකරණය ඉදිරියේ වරද පිළිගෙන ද තිබේ.
