සිංහල, දෙමළ අලුත් අවුරුදු සමයේ මැස්සන්ගේ වර්ධනයත් සමඟ පාචනය රෝගය දරුවන් අතර ව්‍යාප්ත වීමේ අවදානමක් තිබෙන බව කොළඹ රිජ්වේ ආර්යා ළමා රෝහලේ විශේෂඥ වෛද්‍ය දීපාල් පෙරේරා මහතා “දිනමිණ”ට ඊයේ (07) පැවසීය.
නිවසින් බැහැරව නෑදෑ හිතවතුන්ගේ නිවෙස්වල හෝ වෙනත් ස්ථානයන්ට යාමේදී පිරිසිදු ජලය හා ආහාර පරිභෝජනයට ගැනීමෙන් පාචනය වැනි රෝගවලින් වැළකී සිටීමට හැකි බව ද ඒ මහතා පැවසුවේය.
ඊට අමතරව අලුත් අවුරුදු සමයේ පැණි රස සහ තෙල් සහිත ආහාර භාවිතය වැඩි වීමත් සමඟ බෝ නොවන රෝගවලට ගොදුරු වීමේ අවදානමක් පවතින බවත් ඉන් වැළකීම සඳහා අවුරුදු සමයේ කය වෙහෙස කරවන ක්‍රීඩාවල නිරත වීම ඉතා වැදගත් බවත් ඒ මහතා ප්‍රකාශ කළේය.
අවුරුදු සමයේ විනෝදය වගේම ආරක්ෂාව කෙරෙහි ද වැඩි සැලකිල්ලක් දැක්වීමෙන් හදිසි අනතුරුවලින් වැළකී සිටීමට හැකි බව ද ඒ මහතා පැවසුවේය. අතීතයේ වැඩිහිටියන් පැණි රස, තෙල් සහිත ආහාර පරිභෝජනය අවුරුදු සමයේ වැඩිපුර සිදු කළ ද, ඔවුන්ගේ කය ලෙඩරෝගවලින් ආරක්ෂා කර ගැනීම සඳහා කොට්ටපොර, චක්ගුඩු, මැරතන්, ග්‍රීස් ගහේ නැඟීම යනාදී ක්‍රීඩාවල නිරත වූයේ යැයි ද ඒ මහතා අවධාරණය කළේය. ජීවිතයේ ඒකාග්‍රතාවෙන් මිදී දරුවන්ටත්, වැඩිහිටියන්ටත් මානසික සතුටක් දනවන නෑදෑ හිතවතුන්ගේ නිවෙස්වලට යාමෙන් ප්‍රබෝධමත් දිවි පෙවෙතක් ගත කළ හැකි බව ද ඒ මහතා ප්‍රකාශ කළේය.
