ගලේවෙල ප්‍රාදේශීය ලේකම් කොට්ඨාසයේ මැදබැද්ද දකුණු ග්‍රාම නිලධාරී වසමේ පදිංචි විශ්‍රාමික කෘ.ප.නි.ස. නිලධාරියකු වන එල්.ජී. ජයවර්ධන මහතා අක්කරයකින් වී බුසල් 120ක් පමණ අස්වැන්නක් ලබා ගතහැකි නව වී ප්‍රභේදයක් සොයාගෙන ඇත. එම වී වර්ගය සොයාගත් අන්දම ගැන ඔහු මෙසේ විස්තර කළේය. “පසුගිය 2022 – 23 මාස් කන්නයේ මම වී වගා කර ලබා ගත් අස්වැන්න අතර තිබූ වී කරල් දෙකක් ගැන මගේ විශේෂ අවදානය යොමු කළා. ඊට හේතුව එම වී කරල්වල වී ඇට 200ක් පමණ තිබීමයි. එම වී ඇටවල අග කොටසේ කළු පැහැති කුඩා තිතක් තිබීම ගැනද මම සැලකිල්ලක් දැක්වූවා. පසුව මම එම වී කරල් වියළා බිත්තර වී ලෙස ලබාගෙන 2023 – 24 මාස් කන්නයේ වෙනම වගා කළා. එහි අස්වැන්න ලෙස වී කිලෝ 12ක් පමණ ලබා ගත්තා. එම කරල්වල තිබූ වී ඇටවලද කළු පැහැති තිත දකින්නට ලැබුණා. එම වී ප්‍රමාණයද බිත්තර වී ලෙස ලබාගෙන පසුගිය 2024 – 25 මාස් කන්නයේ යළිත් අක්කර තුන් කාලක පමණ වගා කළා. මුලින් තිබූ වී කරල්වලට සමාන ලක්ෂණ මෙවරත් දකින්නට තිබෙනවා. තවම මෙවර අස්වැන්න නෙළා ගත්තේ නෑ. තව සති දෙකකින් පමණ අස්වැන්න නෙළනවා. මෙම වී වර්ගය වපුරා අස්වැන්න නෙළා ගැනීමට මාස හතරහමාරක් පමණ ගතවෙනවා. මෙම වී වර්ගයේ ඇති විශේෂත්වය නම් අනෙක් වී වර්ගවලට වඩා වැඩි වී ප්‍රමාණයක් තිබීමත් බරින් වැඩි වීමත්ය. මෙම වී වර්ගය කුමක්දැයි හඳුනාගැනීමට කෘෂි නිලධාරීන්ගේ සහය ඉල්ලා සිටිනවා. මෙම වී වර්ගය බිත්තර වී ලෙස ලබාගෙන ව්‍යාප්ත කිරීමට බලාපොරොත්තු වෙනවා. මෙම වී වර්ගය වපුරා අක්කර 01කින් බුසල් 120ක් පමණ ලබාගත හැකිවේයැයි මා තුළ දැඩි විශ්වාසයක් තිබෙනවා.”
