රාජ්‍ය ඖෂධ නීතිගත සංස්ථා රාජ්‍ය ඔසුසල් ජාලයේ 64 වැනි රාජ්‍ය ඔසුසල් ශාඛාව කිරිබත්ගොඩ නගරයේ දී සංස්ථාවේ සභාපති වෛද්‍ය මනූජ් සී. වීරසිංහ මහතාගේ ප්‍රධානත්වයෙන් පසුගියදා විවෘත කෙරිණි.
රාජ්‍ය ඖෂධ නීතිගත සංස්ථාවේ රාජ්‍ය ඔසුසල් ජාලයේ 64 වන නව රාජ්‍ය ඔසුසල් ශාඛාව මෙය වන අතර අංක 163, නුවර පාර, කිරිබත්ගොඩ යන ස්ථානයේ මෙම ඔසුසල ස්ථාපිත කිරීමට පියවර ගෙන තිබුණි.
සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස මහතාගේ සංකල්පයක් මත ජනතා අවශ්‍යතාව පරිදි රට පුරා රාජ්‍ය ඔසුසල් ශාඛා ස්ථාපිත කිරීමේ විශේෂ වැඩපිළිවෙළට සමගාමිව මෙම ඔසුසල ස්ථාපිත කෙරිණි.
මෙම රාජ්‍ය ඔසුසල ශාඛාව මඟින් පළපුරුදු ඖෂධවේදීන්ගේ සේවාව යටතේ, නියම ප්‍රමිතියෙන් යුතු ගුණාත්මක ඖෂධ සාධාරණ මිලකට මිල දී ගැනීමට ජනතාවට හැකියාව ලැබෙන අතර, ජ්‍යෙෂ්ඨ පුරවැසියන්, ගර්භිණී මවුවරුන්, වයස අවුරුදු 05 ට අඩු දරුවන් සහ “රණවිරු විරුසර” කාඩ්පත් හිමියන් සඳහා 5%ක සුවිශේෂි වට්ටමක් සහිතව ඖෂධ නිකුත් කිරීම ද විශේෂත්වයකි.
නවීන තාක්ෂණ උපකරණ යොදා ගනිමින් රාජ්‍ය ඖෂධ නීතිගත සංස්ථාවේ තත්ත්ව රසායනාගාරයේ දී අවස්ථා හතරකදීම පරීක්ෂාවට ලක් කිරීමෙන් පසු ඖෂධ වෙළෙඳපොළට යොමු කරන නිසා ජනතාවට විශ්වාසයෙන් යුතුව ඖෂධ ලබා ගැනීමට හැකියාව ලැබේ.
ශ්‍රී ලාංකේය ජනතාවට උසස් තත්ත්වයෙන් යුත් ප්‍රත්‍යක්ෂ ඖෂධ සාධාරණ මිලට ලබා දීමේ ප්‍රමුඛ අරමුණින් මහාචාර්ය සේනක බිබිලේ මහතා විසින් 1971 වර්ෂයේ දී ආරම්භ කළ රාජ්‍ය ඖෂධ නීතිගත සංස්ථාව වසර 53කට අධික කාලයක් මෙරට ජනතාවට ගුණාත්මක ඖෂධ සාධාරණ මිලට සැපයීම සිදු කරයි.
මෙම අවස්ථාවට රාජ්‍ය ඖෂධ නීතිගත සංස්ථාවේ කළමනාකාර අධ්‍යක්ෂ මෙවන් සම්පත් සුභසිංහආරච්චි මහතා ඇතුළු රාජ්‍ය ඖෂධ නීතිගත සංස්ථාවේ නිලධාරීන්, සේවකයින්, කිරිබත්ගොඩ ප්‍ර‍ෙද්ශයේ ව්‍යාපාරකයෝ පිරිසක් සහභාගි වූහ.
