මියන්මාරයේ ඇති වූ භූමිකම්පාවෙන් පීඩාවට පත් ජනතාවට සහන සැලසීම සඳහා ශ්‍රී ලංකා ත්‍රිවිධ හමුදා සාමාජිකයන්ගෙන් සැදුම්ලත් වෛද්‍ය සහ විශේෂ සහන සේවා කණ්ඩායමක් සහ හදිසි ආධාර මියන්මාරයට එවීම පිළිබඳව යැංගොන් කලාපීය ප්‍රධාන ඇමැති U Soe Thein මහතා සිය ප්‍රශංසාව පළ කර සිටියි.
ප්‍රධාන ඇමැතිවරයා එසේ සිය ප්‍රශංසාව පළ කර සිටියේ මියන්මාරය බලා ගිය ශ්‍රී ලාංකික කණ්ඩායම පිළිගැනීමට යැන්ගොන් ජාත්‍යන්තර ගුවන් තොටුපොළ වෙත පැමිණි අවස්ථාවේදීය.
මියන්මාරයේ ශ්‍රී ලංකා තානාපතිවරයා, යැංගොන් නගර සංවර්ධන කමිටුවේ සභාපති (නගරාධිපති) U Bo Htay, යැංගොන් කලාප සමාජ කටයුතු ඇමැති U Htay Aung, යැංගොන් කලාප ආරක්ෂක සහ දේශසීමා කටයුතු ඇමැති කර්නල් Win Tint, විදේශ කටයුතු අමාත්‍යාංශයේ උපායමාර්ගික අධ්‍යයන සහ පුහුණු දෙපාර්තමේන්තුවේ අධ්‍යක්ෂ ජනරාල් U Zaw Phyo Win, සමාජ සුභසාධනය, සහන සේවා සහ නැවත පදිංචි කිරීමේ අමාත්‍යාංශයේ ආපදා කළමනාකරණ දෙපාර්තමේන්තුවේ අධ්‍යක්ෂ U Than Soe මහත්වරු ඇතුළු කණ්ඩායමක් මෙම අවස්ථාවට සහභාගි වී සිටියහ.
ජනාධිපති අනුර කුමාර දිසානායක මහතාගේ උපදෙස් පරිදි ආරක්ෂක ලේකම් එයාර් වයිස් මාර්ෂල් සම්පත් තුයියකොන්තා( විශ්‍රාමික) මහතාගේ අධීක්ෂණය යටතේ ශ්‍රී ලන්කන් ගුවන් සේවයට අයත් විශේෂ ගුවන් යානයකින් මෙම සහන සේවා කණ්ඩායම පෙරේදා දින (05) මියන්මාරය බලා පිටත්විය.
එහිදී වැඩිදුරටත් අදහස් දක්වමින් යැංගොන් කලාපීය ප්‍රධාන ඇමැති U Soe Thein මහතා සඳහන් කළේ ශ්‍රී ලංකාව විසින් දැක්වූ මෙම අගනා සහාය දෙරට අතර පවතින දිගුකාලීන සමීප මිත්‍ර සබඳතාවන් යළි අවධාරණය කරන බවයි.
ශ්‍රී ලංකා විදේශ කටයුතු අමාත්‍යාංශය හා විදේශ කටයුතු ලේකම්වරයා මෙම ආපදා සහන සේවා මෙහෙයුම් ක්‍රියාත්මක කිරීමට අවශ්‍ය කෙරෙන රාජ්‍යතාන්ත්‍රික ක්‍රියාවලිය හා සෘජුව සම්බන්ධ වෙමින් ක්‍රියා කරති.
එරට පරිපාලන අගනුවර වන නේ පි ටෝ (Nay Phi Taw) හි ආපදාවට ලක්වූ ප්‍රදේශවල මානුෂික ආධාර සහ සහන කටයුතු සඳහා ශ්‍රී ලංකා සහන සේවා කණ්ඩායම යෙදවීමට නියමිතව තිබේ. පසුගියදා ඇතිවූ රිච්ටර් පරිමාණයේ 7.7ක ප්‍රබලත්වයෙන් යුත් භූමිකම්පාව හේතුවෙන් මියන්මාරයේ ප්‍රදේශ බොහෝමයකට බලපෑම් එල්ල විය.
