තිරසර සංවර්ධන ඉලක්කවලට අනුව මාතෘ මරණ අනුපාතිකය ලක්ෂයකට 70 දක්වා අඩු කර ගත යුතු වුවත්, ශ්‍රී ලංකාවේ මාතෘ මරණ අනුපාතය වර්තමානය වන විට ලක්ෂයකට 25ක් දක්වා අවම කර ඇතැයි සෞඛ්‍ය හා ජනමාධ්‍ය ඇමැති වෛද්‍ය නලින්ද ජයතිස්ස මහතා පැවසීය.
එය මෙරට නිදහස් සෞඛ්‍ය ක්ෂේත්‍රය ලබාගෙන ඇති ජයග්‍රහණයක් බවත්, එම අගය තවදුරටත් අවම කර ගනිමින් ගුණාත්මක සෞඛ්‍ය සේවාවක් රට තුළ තහවුරු කර ගැනීම සෞඛ්‍ය අමාත්‍යාංශයේ අරමුණ යැයි ද ඇමැතිවරයා ප්‍රකාශ කළේය.
ලෝක සෞඛ්‍ය සංවිධානයේ මෙරට කාර්යාලයේ වැඩබලන ආයතන ප්‍රධානී වෛද්‍ය ෆාරුක් කුරේෂී මහතා සෞඛ්‍ය අමාත්‍යාංශයේ දී හමු වූ අවස්ථාවේ දී ඇමැතිවරයා මේ බව කියා සිටියේය.
ලෝක සෞඛ්‍ය දිනය වෙනුවෙන් ලෝක සෞඛ්‍ය සංවිධානයේ මෙරට කාර්යාලය සහ සෞඛ්‍ය අමාත්‍යාංශය එක්ව සංවිධානය කරනු ලැබූ තෙදින මාර්ගගත සම්මන්ත්‍රණ මාලාව ඇසුරින් සැකසූ විශේෂ විද්වත් වාර්තාව අමාත්‍යවරයාට භාර දීම වෙනුවෙන් මෙම හමුව පැවැත්විණි.
ලෝක සෞඛ්‍ය දිනය සෑම වර්ෂයකම අප්‍රේල් මස 7 වැනි දිනට යෙදී ඇති අතර, මෙවර එම දිනයේ තේමාව Òසෞඛ්‍ය සම්පන්න ආරම්භයක් – බලාපොරොත්තු සහගත අනාගතයක්Ó යන්නය.
ලෝක සෞඛ්‍ය දිනය වෙනුවෙන් සෑම වර්ෂයකම විවිධ ජනතාවාදී වැඩසටහන් ක්‍රියාවට නැංවීමට සෞඛ්‍ය අමාත්‍යාංශය සහ මෙරට ලෝක සෞඛ්‍ය සංවිධානය කටයුතු කළ අතර, මෙම වර්ෂයේ යෝජිත තේමාව යටතේ මාතෘ හා නව ජන්ම මරණ වැළැක්වීම පිණිස මෙරට සහ ජාත්‍යන්තර ප්‍රජාවේ කැපවීම තහවුරු කරමින් පසුගිය අප්‍රේල් 1, 2 සහ 3 යන තෙදින මාතෘ පෝෂණය, මාතෘ මානසික සෞඛ්‍ය සහ මාතෘ යහපැවැත්ම යන මාතෘකාවන් යටතේ ක්ෂේත්‍රයට අදාළ විශේෂඥයින්ගේ සහභාගිත්වයෙන් විශේෂ සම්මන්ත්‍රණ මාලාවක් මාර්ගගත ක්‍රමය ඔස්සේ පැවැත්වීමට කටයුතු කෙරිණි.
මෙම වාර්තාවේ සඳහන් කරුණු පිළිබඳව අවධානය යොමු කරමින් එම කරුණු ක්‍රියාකාරී සැලැස්මට ඇතුළත් කිරීමට පියවර ගන්නා බවත් මෙවැනි සතුටුදායක තත්ත්වයකට යාමට හැකියාව ලැබී තිබෙන්නේ මෙරට සියලු සෞඛ්‍ය වෘත්තිකයන්ගේ දැඩි කැපවීම නිසා බවත් ඇමැතිවරයා පැවසීය.
වත්මන් රජය මවුවරුන් සහ දරුවන්ගේ සෞඛ්‍ය ආරක්ෂණය සහ පෝෂණය කෙරෙහි වැඩි අවදානයක් යොමු කරන බවත්, ඔවුන් මෙරට අනාගත ජීවනාලිය වන බැවින් ඒ සඳහා විශේෂිත වැඩසටහන් ද ක්‍රියාත්මක කිරීමට සැලසුම් කර ඇති බවත් අමාත්‍යවරයා වැඩිදුරටත් පැවසීය.
එමෙන්ම ප්‍රාථමික සෞඛ්‍ය කෙරෙහි දැඩි අවධානයක් යොමු කරන වත්මන් රජය ඒ සඳහාම විශේෂ ව්‍යාපෘති ක්‍රියාත්මක කරන බව ද ඇමැතිවරයා පැවසුවේය.
මෙම අනුපාතයන් තවදුරටත් අවම කර ගැනීමට අවශ්‍ය වන තාක්ෂණික දැනුම මෙන්ම අවශ්‍ය වන සහයෝගීතාව නිරතුරුව ලබාදීමට කටයුතු කරන බව වැඩබලන ආයතන ප්‍රධානී වෛද්‍ය ෆාරුක් කුරේෂී මහතා මෙම හමුවේදී අමාත්‍යවරයාට පැවසීය.
ලෝක සෞඛ්‍ය සංවිධානයේ මෙරට කාර්යාලයේ උපදේශක විශේෂඥ වෛද්‍ය සූසි පෙරේරා, වෛද්‍ය යසාරා සමරකෝන්, වෛද්‍ය සමීර හේවගේ, වෛද්‍ය සුවීන්ද්‍රන් තිරුපති මහත්ම මහත්මීන් ඇතුළු නිලධාරීහු පිරිසක් ද මෙම අවස්ථාවට එක්ව සිටියහ.
