බුද්ධගයා අර්බුදය පිළිබඳව කරුණු සඳහන් කරමින් සකස් කරන ලද සංදේශයක් මහනාහිමිවරුන් විසින් ඉන්දීය අගමැති නරේන්ද්‍ර මෝදි මහතාට අනුරාධපුර ජය ශ්‍රී මහා බෝ සමිඳුන් අබියසදී භාර දෙන ලදී.ඉන්දීය අගමැතිගේ තෙදින නිල සංචාරය නිම කර යළි ඉන්දියාවට යෑමට පෙර පෙරේදා (06) ජය ශ්‍රී මහා බෝ සමිඳුන්ගේ ආශිර්වාද ලබා ගැනීමට ගිය අවස්ථාවේදී එම සංදේශය සංඛේතාත්මකව භාරදීමට මහනාහිමිවරු පියවර ගත්හ. බුද්ධගයාව දැඩි ලෙස හින්දුකරණයට ලක් වෙමින් පවතින බවත්, බුද්ධගයා පරිපාලන මණ්ඩලයේ බහුතරය හින්දූන්ගෙන් සමන්විතව ඇති බවත් පවසමින් එයට දැඩි විරෝධයක් ඉන්දියාවෙන්ම මතුව තිබේ. එයට නායකත්වය දෙන ඉන්දීය බෞද්ධයන් ප්‍රකාශ කරන්නේ වහාම බුද්ධගයාවේ අයිතිය සහ පරිපාලනය සම්බන්ධව වගකීම සම්පූර්ණයෙන් බෞද්ධයන්ට පවරන ලෙසයි. මේ අනුව උද්ගතව තිබෙන තත්ත්වය සලකා බලමින් මහානායක මාහිමිවරුන්ගේ අත්සනින් යුතුව මේ සංදේශය භාර දුන්හ.
