මාතර රාහුල විද්‍යාලයේ සිසු පිරිසක් ජනාධිපති කාර්යාලය සහ ජනාධිපති මන්දිරය නැරඹීමට ඊයේ (07) පැමිණියහ. ජනාධිපති කාර්යාලය, අධ්‍යාපන අමාත්‍යාංශය හා පාර්ලිමේන්තු ජනසන්නිවේදන අංශය ඒකාබද්ධව ක්‍රියාත්මක කරන මේ වැඩසටහන යටතේ පාසල් දරුවන්ගේ අධ්‍යයන ක්ෂේත්‍රයන්ට අදාළව ජනාධිපති කාර්යාලය, ජනාධිපති මන්දිරය, කොළඹ වරාය නගරය හා පාර්ලිමේන්තුව නැරඹීමට අවස්ථාව උදා කර දී ඇත.
ජනාධිපති අනුර කුමාර දිසානායක මහතාගේ සංකල්පයකට අනුව ක්‍රියාත්මක “ක්ලීන් ශ්‍රී ලංකා වැඩසටහන” පාර්ලිමේන්තු ඉතිහාසය, විධායකයේ කාර්යභාරය සහ නීතියේ ආධිපත්‍යය සම්බන්ධව විද්‍යාලයේ ආචාර්ය මණ්ඩලය සහ ශිෂ්‍යයන් දැනුම්වත් කිරීමේ වැඩසටහනක් ද මෙයට සමගාමීව ක්‍රියාත්මක කෙරිණි.
මීට අමතරව “ක්ලීන් ශ්‍රී ලංකා” වැඩසටහනට සමගාමීව මාතර රාහුල විද්‍යාලය ආරම්භ කළ රුක් රෝපණ සතිය නිමිත්තෙන් විද්‍යාලය වෙත වටිනා ශාක ප්‍රදානය කිරීම අග්‍රාමාත්‍ය ආචාර්ය හරිනි අමරසූරිය සහ ජනාධිපති ලේකම් ආචාර්ය නන්දික සනත් කුමානායක මහතා අතින් සිදුවිය.
ජනාධිපති ලේකම් කාර්යාලය නැරඹීමට පැමිණ සිටි පාසල් සිසුන් වෙනුවෙන් අගමැතිනිය සහ ජනාධිපති ලේකම්වරයා දේශනයක් ද සිදු කළහ.
මෙහිදී සිසුන් අග්‍රාමාත්‍යවරිය වෙත ප්‍රශ්න කිහිපයක්ද යොමු කළ අතර, අග්‍රාමාත්‍යවරිය එම ප්‍රශ්නවලට පිළිතුරු ලබා දුන්නාය.
ජනාධිපති ජ්‍යෙෂ්ඨ අතිරේක ලේකම් කේ.එම්.එන්. කුමාරසිංහ, ජනාධිපති උපදේශක (නීති) නීතිඥ ජේ.එම්. විජේබණ්ඩාර, අධ්‍යක්ෂ (ත්‍රිවිධ හමුදා සම්බන්ධීකරණ) එයාර් කොමදෝරු ආසිරි ගාල්ලගේ, සහකාර අධ්‍යක්ෂ නදීක දංගොල්ල මහත්වරුද, මාතර රාහුල විද්‍යාලයේ විදුහල්පතිනි සමිතා කුරුකුලසූරිය මහත්මිය ඇතුළු ගුරු භවතුන් පිරිසක්ද මෙම අවස්ථාවට එක්ව සිටියහ.
