තායිලන්තයේ සිට කටුනායක ගුවන්තොටුපොළ වෙත පැමිණි ගුවන්යානයක ගමන් ගත් ගුවන් මගියකුගේ අත්බෑගය තුළ වූ දේශීය සහ විදේශීය මුදල් තොගයක් සොරාගත් චීන ජාතිකයන් දෙදෙනකු ඊයේ (07) උදෑසන අත්අඩංගුවට ගත් බව ගුවන්තොටුපොළ පොලීසිය පවසයි.
සොරාගනු ලැබූ එම මුදලින් කොටසක් ද පොලීසිය විසින් සොයාගනු ලැබ තිබිණි.
ශ්‍රී ලංකාවේ සහ අමෙරිකාවේ ද්විත්ව පුරවැසිභාවය හිමි 71 හැවිරිදි මොහු රාගම, වැලිසර ප්‍රදේශයේ පදිංචි තම ඥාතීන් බැලීම සඳහා කටුනායක ගුවන්තොටුපොළ වෙත පැමිණෙමින් සිටියේය.
ඔහු ඊයේ (07) දින අලුයම 12.43ට තායිලන්තයේ බැංකොක් නුවර සිට තායි ගුවන් සේවයේ ටී.ජී.- 307 දරන ගුවන්යානයෙන් කටුනායක ගුවන්තොටුපොළ වෙත පැමිණ සිටියේය. මොහු සිය ගමන් මල්ල, ගුවන් යානයෙහි ගමන් මලු රාක්කයේ තබා, නිදාගෙන පැමිණ සිටි අතර, එම ගුවන්යානයෙහි ගමන් ගත් චීන ජාතිකයන් දෙදෙනකු, එම ගමන් මල්ල තුළ වූ අමෙරිකානු ඩොලර් 2,000ක් සහ ශ්‍රී ලංකා රුපියල් 60,000ක් සොරාගෙන තිබේ.
මෙම සිදුවීම දුටු අනෙකුත් ගුවන් මගීන් මේ පිළිබඳ ගුවන්යානා කාර්ය මණ්ඩලය දැනුවත් කිරීමට පියවර ගෙන ඇත.
ඉන්පසුව මෙම ගුවන්යානය කටුනායක ගුවන්තොටුපොළ වෙත ගොඩබැස්ස වීමෙන් අනතුරුව ගුවන්යානා කාර්ය මණ්ඩලය විසින් මෙම චීන ජාතිකයන් දෙදෙනා ගුවන්තොටුපොළ ආරක්ෂක නිලධාරීන් වෙත භාර දී තිබේ.
ඒ අනුව 36 හැවිරිදි එක් චීන ජාතිකයකු සන්තකයෙහි තිබූ අමෙරිකානු ඩොලර් 900ක් සහ ශ්‍රී ලංකා රුපියල් 55,000ක මුදලක් ද, අනෙක් 39 හැවිරිදි චීන ජාතිකයා සන්තකයෙහි අමෙරිකානු ඩොලර් 300ක මුදලක් ද සඟවා ගෙන තිබියදී පොලීසිය විසින් සොයාගෙන තිබුණි.
