බුලත්සිංහල නගරයේ වෙළඳසැලක් කොල්ලකා පලා යමින් සිටි පුද්ගලයන් දෙදෙනෙකු අත්අඩංගුවට ගත් බව අඟුරුවාතොට පොලීසිය පවසයි.
මෙසේ අත්අඩංගුවට ගෙන ඇත්තේ බුලත්සිංහල පදිංචි වයස අවුරුදු 20-22 අතර පුද්ගලයන් දෙදෙනෙකි.
බුලත්සිංහල සිට යාල හන්දිය හරහා ඊයේ (07) රාත්‍රී 1.00ට පමණ කළුතර දෙසට අධික වේගයෙන් ගමන් කිරීමට පැමිණි යතුරුපැදියක් නවතන ලෙසට යාල මංසන්ධියේ ආරක්ෂක මුර රාජකාරියේ යෙදී සිටි පොලිස් නිලධාරී කණ්ඩායම සංඥා කර ඇති බවත් ඔවුන් අණ නොතකා ධාවනය කර ඇති බවත් පොලීසිය පවසයි. පසුව හදිසි මාර්ග බාධක යොදා මෙම සැකකරුවන් දෙදෙනා අල්ලා ගැනීමට පොලීසිය සමත් වී ඇත.
සැකකරුවන්ගෙන් ප්‍රශ්න කිරීමේදී බුලත්සිංහල නගරයේ වෙළඳසැලක් කොල්ලකා පලායන බවට තොරතුරු අනාවරණය වූ බවය පොලීසිය කියයි.
සැකකරුවන් කොල්ලකා තිබූ භාණ්ඩ අතර රුපියල් 65000 මුදලක්, දුම්වැටි පැකට් 25ක්, ජංගම දුරකතන පෙර ගෙවුම් කාඩ් 450ක ප්‍රමාණයක් හා සැකකරුවන් ගමන් ගත් යතුරුපැදිය පොලීසිය විසින් අත්අඩංගුවට ගෙන ඇත.
