බූස්ස අධිආරක්ෂිත බන්ධනාගාරයේ රැඳවූවකු තවත් රැඳවූවකුට උල් ආයුධයකින් ඇන ඝාතනය කිරීමේ සිද්ධිය සම්බන්ධයෙන් මූලික විමර්ශනය සඳහා පත් කළ කමිටුව රැඳවූවන්ගෙන් ප්‍රකාශ සටහන් කර ගැනීම අද (08) දිනයේ සිදු කිරීමට නියමිතය.
මේ පිළිබඳ මූලික විමර්ශන කටයුතු සඳහා වටරැක බන්ධනාගාරයේ සහකාර අධිකාරිවරයා සහ බූස්ස බන්ධනාගාරයේ ජේලර්වරයකුව බන්ධනාගාර දෙපාර්තමේන්තුව පත් කර ඇති අතර, සිද්ධිය සම්බන්ධයෙන් බන්ධනාගාර නිලධාරින් සිව්දෙනකුගෙන් ප්‍රකාශ සටහන් කර ගෙන තිබේ.
එන්.කේ. ශිවනන්දන් (46) නැමැති බටලන්දහේන ගොතටුව ප්‍රදේශයේ පදිංචිකරුවකු වන මියගිය සැකකරු, මාලිගාකන්ද මහේස්ත්‍රාත් අධිකරණය මඟින් හෙරොයින් මත්ද්‍රව්‍ය චෝදනාව යටතේ 2022.06.09 වැනි දින රක්ෂිත බන්ධනාගාරගත කර ඇති අතර, කොළඹ මැගසින් බන්ධනාගාරය වෙත ඇතුළත් කිරීමෙන් පසු රැඳවුම් නියෝග මත බූස්ස බන්ධනාගාරය වෙත මාරු කර යවා තිබිණි.
එහිදී බූස්ස අධිආරක්ෂිත බන්ධනාගාරයේ ‘සී’ වාට්ටුව තුළ රඳවා සිටි ඔහු පසුගිය 04 වැනි දින උදෑසන පපුව ප්‍රදේශයේ ඇනුම් තුවාල සහිතව රඳවා සිටි වාට්ටුවේ වැටී සිට ඇත. පසුව බන්ධනාගාර නිලධාරීන් කඩිනමින් ගාල්ල ජාතික රෝහල වෙත රැගෙන යෑමට කටයුතු කර ඇති අතර, එහිදී සැකකරු මියගොස් ඇති බවට රෝහල මඟින් දැනුම්දී තිබේ. බන්ධනාගාර ආරංචිමාර්ග පවසන්නේ මෙම බන්ධනාගාරයේ එකම සිරමැදිරියක රඳවා සිටි රැඳවූවන් දෙදෙනෙකු අතර ඇති වූ ආරවුලක් හේතුවෙන් මෙම ඝාතනය සිදු වන්නට ඇති බවයි. බූස්ස බන්ධනාගාරයේ රඳවා සිටින ‘කුඩු සළිඳු’ගේ කල්ලිය සමඟ මෙම රැඳවූවා හිතනොහොඳින් කල් ගෙවූ බවද බන්ධනාගාර ආරංචි මාර්ග සඳහන් කරයි. එම කල්ලි අතර පවතින ගැටුම් හේතුවෙන් මේ රැඳවූවාට පහර දීමක් සිදු කළේ ද යන්න පිළිබඳවත් සැක මතු වී තිබේ. කෙසේ වෙතත් එම බන්ධනාගාර නිලධාරින් මත පළ කර ඇත්තේ මත්ද්‍රව්‍ය ජාවාරම් කල්ලිවලට සම්බන්ධ රැඳවූවන් අතර කලක පටන් පැවැති මතභේදයක් මෙම සිද්ධියට මුල් වන්නට ඇති බවයි.
මියගිය රැඳවූවාගේ සිරුරේ ස්ථාන 11ක පමණ උල් ආයුධයකින් ඇන තිබූ තුවාල හඳුනාගෙන ඇති අතර මෙම සිද්ධියට අදාළ සැකකරු, මිනීමැරුම් නඩු ඇතුළු නඩු කීපයක් සඳහා දැනට සිරදඬුවම් විඳින රැඳවූවකු බවට හඳුනාගෙන ඇත. මියගිය රැඳවූවාගේ දේහය පිළිබඳ පශ්චාත් මරණ පරීක්ෂණය පසුගිය 05 වැනිදා ගාල්ල, කරාපිටිය රෝහලේදී සිදු කළ අතර මෘත ශරීරය ඥාතීන් වෙත භාර දීම සිදු කර තිබේ.
