අමෙරිකාව විසින් ආනයනික භාණ්ඩ සඳහා තීරුබදු ඉහළ නැංවීමේ ක්‍රියාවලිය මධ්‍යයේ යුරෝපය මේ වසර අවසන් වීමට පෙර ඉන්දියාව සමඟ නිදහස් වෙළෙඳ ගිවිසුමකට එළැඹීමට සැලසුම් කර ඇතැයි විදෙස් මාධ්‍ය වාර්තා කරයි. වසර කිහිපයක් පුරා දෙපාර්ශ්වය අතර සිදුකළ සාකච්ඡා අවසන් අදියරේ පවතින බවත්, කෘෂිකාර්මික, ඖෂධ හා මෝටර් රථ එම නිදහස් වෙළෙඳ ගිවිසුම මඟින් ප්‍රමුඛතාව ලැබී ඇතැයි විදෙස් මාධ්‍ය වැඩිදුරටත් වාර්තා කරයි. යුරෝපීය බාහිර ක්‍රියාකාරකම් සේවාවේ දේශගුණය හා පරිසරය සඳහා පත් කර ඇති විශේෂ නියෝජිත ඇන්තනී ඇගෝතා දෙපාර්ශ්වය අතර නිදහස් වෙළෙඳ ගිවිසුමක වැදගත්කම ඉස්මතු කරමින් ඒ පිළිබඳ සාකච්ඡා කඩිනමින් නිමා කිරීමට කටයුතු කර ඇතැයි ද, ඉන්දීය අගමැති නරේන්ද්‍ර මෝදි සහ යුරෝපා සංගමයේ ප්‍රධානි උර්සුලා වොන් ඩර් ලේයන් ද එම ගිවිසුම සම්බන්ධව ධනාත්මක ප්‍රතිචාර දක්වා ඇතැයි ද විදෙස් මාධ්‍ය සඳහන් කරයි. මේ වනවිටත් යුරෝපය ඉන්දියාවේ විශාලතම වෙළෙඳ සහකරු වන බවත්, වසර 2023දී පමණක් දෙරට අතර පවුම් බිලියන 124ක වෙළෙඳ ගනුදෙනු සිදුවී ඇති බවත් වාර්තා වේ.
