ට්‍රම්ප්ගේ බදු ප්‍රතිපත්තිය හේතුවෙන් බලපෑම් එල්ල වූ රටවල් 50කට වැඩි ප්‍රමාණයක් ද්විපාර්ශ්වික වෙළෙඳ ගනුදෙනු යළි සමාලෝචනයට ලක් කිරීමට සාකච්ඡාවක් ඉල්ලා ඇතැයි ධවල මන්දිරයේ පරිපාලන නිලධාරිහු ප්‍රකාශ කළ බව විදෙස් මාධ්‍ය වාර්තා කරයි.
නව තීරු බදු නිවේදනය කිරීමෙන් පසු එම රටවල නියෝජිතයන් අමෙරිකාව සමඟ සාකච්ඡා ආරම්භ කළ බව අමෙරිකාවේ භාණ්ඩාගාර ලේකම් ස්කොට් බෙසෙන්ට් ප්‍රකාශ කළ බව ද වාර්තා වේ. එහෙත් එම රටවල් කවරේදැයි ඔහු හෙළි නොකළ බව ද විදෙස් මාධ්‍ය සඳහන් කරයි.
ට්‍රම්ප්ගේ බදු ප්‍රතිපත්තිය ප්‍රකාශයට පත් කළ සතිය ඇතුළත එරට කොටස් වෙළෙඳපොළ ඩොලර් ට්‍රිලියන 6කට ආසන්න ප්‍රමාණයකින් පහත වැටීමෙන් අමෙරිකාවේ ආර්ථිකය බිඳ වැටෙනු ඇතැයි ජාත්‍යන්තර අනාවැකි පළ වූවද, සිය ආර්ථිකය ශක්තිමත් කිරීමේ හැකියාව නව බදු ප්‍රතිපත්තියෙන් ලැබෙන බව ද ධවල මන්දිර පරිපාලන සඳහන් කළ බව විදෙස් මාධ්‍ය වැඩිදුරටත් වාර්තා කරයි.
