අගමැති නරේන්ද්‍ර මෝදිගේ සංචාරය අතරතුර ශ්‍රී ලංකා රජයෙන් ඔහුට පිරිනැමුණු මිත්‍ර විභූෂණ සම්මානය දෙරට අතර අන්‍යේන්‍ය මිත්‍රත්වයේ වැදගත් සංධිස්ථානයක් බව ඉන්දියාවේ ඒඑන්අයි පුවත් සේවය වාර්තා කළේය. විශේෂයෙන් එම සම්මානයෙන් තමාට ගෞරවය දැක්වීම සම්බන්ධයෙන් අගමැති මෝදි මහතා ශ්‍රී ලංකා ජනාධිපති අනුර කුමාර දිසානායක මහතාට, රජය සහ ශ්‍රී ලංකා ජනතාවට කෘතඥතාව පළ කළ බවත්, එම ගෞරවය දෙරටේහිම ජනතාව අතර ගැඹුරින් මුල් බැසගත් මිත්‍රත්වය සහ ඓතිහාසික සබඳතා පෙන්නුම් කරන බවත් අගමැති මෝදි මහතා ප්‍රකාශ කළ බව ඒඑන්අයි පුවත් සේවය වැඩිදුරටත් වාර්තා කළේය.
එක්ස් සමාජ මාධ්‍යජාලයේ සටහනක් තබමින් අගමැතිවරයා විසින් සිදු කළ ප්‍රකාශය ද ඒඑන්අයි පුවත් සේවය උපුටා දක්වා තිබේ. “අද ජනාධිපති අනුර කුමාර දිසානායක මහතා අතින් ‘ශ්‍රී ලංකා මිත්‍ර විභුෂණ’ සම්මානය මට පිරිනැමීම ඉමහත් ආඩම්බරයට කරුණක්. මෙම ගෞරවය මට පමණක් හිමි නොවේ. එය ඉන්දියාවේ බිලියන 1.4ක ජනතාවට උපහාරයකි. එය ඉන්දියාවේ සහ ශ්‍රී ලංකාවේ ජනතාව අතර මිත්‍රත්වය සංකේතවත් කරයි. එවැනි ගෞරවයක් දැක්වීම ගැන ජනාධිපතිවරයාට, රජයට හා ශ්‍රී ලංකා ජනතාවට මාගේ හෘදයාංගම කෘතඥතාව පළ කරමි.” වසර 2019න් පසු සිය පළමු ශ්‍රී ලංකා සංචාරය සනිටුහන් කරමින් අගමැති මෝදි මහතා පසුගිය සිකුරාදා කොළඹට පැමිණි බවත්, ඔහු ශ්‍රී ලංකා සංචාරයට එක්වූයේ තායිලන්ත සංචාරයක් අවසන් කිරීමෙන් පසුව බවත් ඒඑන්අයි පුවත් සේවය සඳහන් කරයි.
