අමෙරිකානු ජනාධිපති ඩොනල්ඩ් ට්‍රම්ප්ගේ ගෝලීය තීරුබදු ප්‍රතිපත්තිය හේතුවෙන් ආසියානු කොටස් වෙළෙඳපොළ වසර 17කට තනි දිනයක දරුණු බිඳ වැටීමකට ලක්වූ පළමු අවස්ථාව ඊයේ වාර්තා වූ බව විදෙස් මාධ්‍ය සඳහන් කරයි. ෂැංහායි සිට ටෝකියෝ දක්වා සහ හොංකොං රාජ්‍යය ඇතුළු තවත් රටවල් රැසක කොටස් වෙළෙඳපොළ දැඩි පසුබෑමකට ලක්වූ බවත් විදෙස් මාධ්‍ය වාර්තා කරයි. ෂැංහායි කොටස් වෙළෙඳපොළ 8%කින් ද, හොංකොං හි හැං සෙං කොටස් 13%කට වැඩි ප්‍රමාණයකින් ද පහත වැටී ඇති අතර, ජපානයේ නිකී 225 කොටස් 7.8%කින් ඊයේ පහත වැටුණු බව විදෙස් මාධ්‍ය වැඩිදුරටත් වාර්තා කරයි. වසර 2008න් පසුව ආසියාවේ කොටස් වෙළෙඳපොළට ට්‍රම්ප්ගේ තීරුබදු ප්‍රතිපත්තියෙන් දැඩි බලපෑම් එල්ල වී ඇත්තේ ආසියානු කලාපයේ මෝටර් රථ නිෂ්පාදනයේ සිට ඇඟලුම් නිෂ්පාදනය දක්වා අමෙරිකාව ප්‍රධානතම ගැනුම්කරු ලෙස කටයුතු කිරීම හේතුවෙන් බව ද වාර්තා වේ. වියට්නාමය සහ බංග්ලාදේශය වැනි රටවල ප්‍රධානතම අපනයන වෙළෙඳපොළ කේන්ද්‍ර වී ඇත්තේ අමෙරිකාව මත බැවින් තීරුබදු ඉහළ නැංවීමෙන් ආසියානු කලාපයේ රටවල් පෙර නොවූ විරූ ආකාරයේ ආර්ථික පසුබෑමකට ලක්වනු ඇතැයි අනාවැකි පළ වී තිබේ. අමෙරිකානු තීරුබදු ප්‍රතිපත්තියෙන් බංග්ලාදේශයේ අපනයනවලට 37%ක තීරුබදු පනවා ඇති අතර එරට ඇඟලුම් නිෂ්පාදන හා අපනයනකරුවන්ගේ සංගමයට අනුව අමෙරිකාවට එරටින් අපනයනය කරනු ලබන ඇඟලුම් නිෂ්පාදන වටිනාකම ඩොලර් බිලියන 8.4ක් වන බවද වාර්තා වේ.
