මෙවර අයිපීඑල් තරගාවලියේ තරග 18ක් නිමා වන විට එකම අපරාජිත කණ්ඩායම බවට පත්වීමට දිල්ලි කැපිටල්ස් පිල සමත්ව සිටියි.
පෙරේදා පැවති තරගාවලියේ 17 වැනි තරගයේදී චෙන්නායි පිල ලකුණු 25කින් පරාජය කරමින් අඛණ්ඩව තෙවැනි ජය වාර්තා කිරීමට දිල්ලි පිල සමත් වූයේ ප්‍රසාද ලකුණු සටහනේ පෙරමුණ ගනිමිනි. චෙන්නායිහිදී පැවති තරගයේ පළමුව පන්දුවට පහර දෙමින් දිල්ලි පිල දුන් ලකුණු 184ක ඉලක්කය හමුවේ චෙන්නායි පිලට ඕවර 20 අවසානයේ කඩුලු 5ක් දැවී රැස් කළ හැකි වූයේ ලකුණු 158ක් පමණි.
විජය ශංකර් නොදැවී ලකුණු 69ක් හ මහේන්ද්‍ර සිං දෝනි නොදැවී ලකුණු 30ක් රැස් කළ ද කණ්ඩායම ජයග්‍රහණය කරා ගෙන යෑමට ප්‍රමාණවත් නොවීය. පන්දු යැවීමේදී විප්‍රජ් නිගම් කඩුලු 2ක් දවා ගත්තේය. දිල්ලි පිල වෙනුවෙන් විශිෂ්ට ඉනිමක් ක්‍රීඩා කළ ලෝකේෂ් රාහුල් පන්දු 51කින් ලකුණු 77ක් රැස් කළ අතර, අභිෂේක් පොරෙල් ලකුණු 33ක් ඉනිමට එක් කළහ. පන්දු යැවීමේදී කලීල් අහමඩ් කඩුලු 2ක් දවාගත් අතර, මතීෂ පතිරණට දවාගත හැකි වූයේ කඩුල්ලක් පමණි.
රාජස්ථාන් දෙවැනි ජය ලබයි
මේ අතර මෙවර තරගාවලියේ සිය දෙවැනි ජය වාර්තා කිරීමට වනිඳු හසරංග සහ මහීෂ් තීක්ෂණ ක්‍රීඩා කරන රාජස්ථාන් රෝයල්ස් පිල පෙරේදා රාත්‍රියේ සමත් විය.
තරගාවලියේ මුල් තරග දෙක පරාජය වූ රාජස්ථාන් පිල පිට පිට අත්කරගත් දෙවැනි ජය මෙය වන අතර, පන්ජාබ් පිලේ පළමු පරාජයයි.
මුල්ලාන්පූර්හිදී පැවති තරගාවලියේ 18 වැනි තරගයේදී රාජස්ථාන් පිල පළමුව පන්දුවට පහර දෙමින් ලකුණු 205ක් රැස් කළ අතර, පිළිතුරු ලෙස පන්ජාබ් පිලට ඕවර 20 අවසානයේ කඩුලු 9ක් දැවී රැස් කළ හැකි වූයේ ලකුණු 155ක් පමණි.
නෙහාල් වධේරා ලකුණු 62ක් රැස් කරමින් පන්ජාබ් පිල ජයග්‍රහණය කරා ගෙන යෑමට උත්සාහ කළ ද එය අසාර්ථක විය. පන්දු යැවීමේදී ජොෆ්රා ආචර් කඩුලු 3ක්, සන්දීප් ශර්මා සහ මහීෂ් තීක්ෂණ කඩුලු 2 බැගින් දවාගත් අතර, වනිඳු හසරංගට දවාගත හැකි වූයේ කඩුල්ලක් පමණි.
යශස්වි ජයිස්වාල් ලකුණු 67ක් රැස් කරමින් රාජස්ථාන් ඉනිමේ වැඩිම ලකුණුලාභියා වූ අතර, රියාන් පරාග් නොදැවී ලකුණු 43ක් සහ සංජු සැම්සන් ලකුණු 38ක් ඉනිමට එක් කළහ.
පන්දු යැවීමේදී ලොකී ෆර්ගසන් කඩුලු 2ක් දවා ගත්තේය.
