සංචාරක පාකිස්තාන සහ නවසීලන්ත කණ්ඩායම් අතර මවුන්ට් මොග්නීර්හි බේ ඕවල් පිටියේ පැවති තුන්වැනි හා අවසන් එක්දින තරගය අතරතුර පාකිස්තාන පිලේ තුන් ඉරියව් ක්‍රීඩක කුෂ්දිල් ෂා හා නරඹන්නන් අතර බහින්බස් වීමක් සිදුවීමෙන් උණුසුම් තත්ත්වයක් හටගත් බව වාර්තා වේ.
මේ පිළිබඳ නිවේදනයක් නිකුත් කරමින් පාකිස්තාන ක්‍රිකට් පාලක මණ්ඩලය ප්‍රකාශ කර ඇත්තේ තරගය නැරඹීමට පැමිණ සිටි ඇෆ්ගනිස්තාන් ජාතිකයන් කිහිපදෙනකු පාකිස්තාන විරෝධී සටන් පාඨ කියමින් කෑගැසීම හේතුවෙන් කුෂ්දිල් ෂා දැඩි කෝපයට පත්වූ අතර පාකිස්තාන පිල ලකුණු 33කින් පරාජයට පත්වූ එම තරගයට කුෂ්දිල් ක්‍රීඩා නොකළ බවත්, ඔහු අතිරේක ක්‍රීඩකයකු ලෙස කටයුතු කළේය.
ඇෆ්ගන් ජාතිකයන් පාකිස්තාන විරෝධී සටන් පාඨ කියමින් කෑගැසීමත් සමඟ කෝපයට පත් කුෂ්දිල් ෂා හතරේ සීමාව මායිම් කළ වැටෙන් පැන ඔවුන්ට පහරදීමට උත්සාහ කර ඇති අතර, පසුව ආරක්ෂක නිලධාරීන් මැදිහත්වී සිදුවීම පාලනය කරගත් බව ද වාර්තා වේ. අනතුරුව ඇෆ්ගනිස්තාන ජාතික නරඹන්නන් දෙදෙනකු පිටියෙන් ඉවත් කිරීමට ආරක්ෂක අංශ පියවර ගත් බව ද වාර්තා වේ.
