ප්‍රබල සීආර් ඇන්ඩ් එෆ්සී ක්‍රීඩා සමාජයට එරෙහිව ලකුණු 41-33ක විශිෂ්ට ජයක් වාර්තා කළ ශ්‍රීනාත් සූරියබණ්ඩාරගේ නායකත්වයෙන් යුතු මහනුවර ක්‍රීඩා සමාජය වසර 6කට පසුව පිළිමලුන් පිටුදැකීමේ ක්ලිෆර්ඩ් කුසලානය දිනා ගැනීමට සමත් විය.
මහනුවර පිලේ ශ්‍රීනාත් සූරියබණ්ඩාරට ක්‍රීඩා අධ්‍යක්ෂ ජනරාල් ෂේමාල් ප්‍රනාන්දු මහතා අතින් ක්ලිෆර්ඩ් කුසලානය පිරිනැමු අයුරු.
ඊයේ පස්වරුවේ නිත්තවෙල ක්‍රීඩාංගණයේදී ගැමුණු චේතියගේ නායකත්වයෙන් යුතු සීආර් පිල සමඟ කරට කර සටනක නිරත වූ මහනුවර පිල ක්ලිෆර්ඩ් කුසලානයට හිමිකම් කීවේ වසර 6කට පසුවය. අවසන් වරට 2018දී නාවික හමුදා පිල පරාජය කරමින් කුසලානය ජයගත් මහනුවර පිල මෙවර 23 වරටත් කුසලානයට හිමිකම් කියමින් වැඩිම වාර ගණනක් ශූරතාව දිනූ කණ්ඩායම ලෙස සිය වාර්තාව යළි අලුත් කිරීමට ද සමත් විය.
තරගයේ පළමු භාගය නිමා වන විට ලකුණු 17-14කින් පෙරමුණ ගැනීමට මහනුවර පිල සමත්වූවද, දෙවැනි භාගයේදී සීආර් ක්‍රීඩකයන් වෙතින් දැඩි පීඩනයක් එල්ල වූ අතර, 77 වැනි මිනිත්තුවේදී සීආර් පිල ලැබූ සටන්කාමී ගෝලයකින් පසුව ලකුණු තත්ත්වය 34-33ක් බවට පත්විය. මහනුවර පිලේ මුහුණ දුන් පීඩනය තුරන් කරමින් අතිරේක මිනිත්තුවේදී අනගි උත්සාහක දිනුමක් තැබීමට හේෂාන් ජැන්සන් සමත් වූ අතර, ඊයේ සිය අවසන් ක්‍රීඩා සමාජ තරගයට සහභාගි වූ සුපිරි ක්‍රීඩක නයිජල් රත්වත්ත එය ගෝලයක් බවට පත් කිරීමත් සමඟ තරගයේ ජය මහනුවර පිලට තහවුරු විය.
මහනුවර පිල රැස් කළ ලකුණු සංඛ්‍යාවට ගෝල් 5ක් සහ දඬුවම් පහර 2ක් ඇතුළත් වූ අතර, සීආර් පිලට රැස් කිරීමට හැකිවූයේ ගෝල් 4ක් සහ උත්සාහක දිනුමක් පමණි. මහනුවර පිල වෙනුවෙන් දිල්රුක්ෂ දංගේ, නයිජල් රත්වත්ත, කෙනුල හෙට්ටිආරච්චි, ඩිල්ෂාඩ් ෆරීඩ් සහ හේෂාන් ජැන්සන් උත්සාහක දිනුම් තැබූහ. ඉන් 4ක්ම ගෝල බවට පත් කළ නයිජල් රත්වත්ත දඬුවම් පහර 2ක් ද සාර්ථක කරගත්තේය. ඉතිරි උත්සාහක දිනුම ගෝලයක් බවට පත් කරනු ලැබුවේ ශාහිඩ් සුම්රි විසිනි.
සීආර් පිල වෙනුවෙන් ඕමල්ක ගුණරත්න උත්සාහක දිනුම් 2ක් තැබීමට සමත්වූ අතර, චමෝද් මුතුනායක, සුබ්රි දොරේ සහ මනිල්ක රුබේරු සෙසු උත්සාහක දිනුම්වලට හිමිකම් කීහ. සීආර් පිලේ උත්සාහක දිනුම් 4ම ගෝල බවට පත් කරනු ලැබුවේ සුබේර් දොරේ විසිනි. හිටපු විශිෂ්ට ක්‍රීඩක ෆාසිල් මරිජා මහනුවර පිලේ ප්‍රධාන පුහුණුකරු ලෙස කටයුතු කළ අතර, සීආර් පිලේ ප්‍රධාන පුහුණුකරු ලෙස කටයුතු කරනු ලැබුවේ දුෂ්‍යන්ත් ලෙව්කේ විසිනි.
