රිදීමාලියද්ද ප්‍රාදේශීය ලේකම් කොට්ඨාසයේ ප්‍රධාන නගරය නව ආඳාඋල්පත නගර මධ්‍යයේ පිහිටි ඔරලෝසු කණුවේ මාස කිහිපයක සිට වේලාව වැඩ නොකරන බවත් ඔරලෝසු කණුව පෞද්ගලික ආයතනයක වෙළෙඳ දැන්වීමකට පමණක් සීමා වී ඇති බව ප්‍රදේශවාසීහු පවසති.
රිදීමාලියද්ද ප්‍රාදේශීය සභාව විසින් පාලනය වන මෙම ඔරලෝසු කණුවේ නඩත්තු කටයුතු සඳහා පෞද්ගලික ඇඟලුම් ආයතනයකට බදු දී තිබෙන බවත් මේ වන විට මෙම ඔරලෝසු කණුවේ වේලාව නැවතී මාස 4ක් පමණ වන බවත් දැනට මෙම ඔරලෝසු කණුව බදු ගත් පෞද්ගලික ආයතනයේ වෙළෙඳ දැන්වීම් ප්‍රචාරක කණුවක් බවට පත්වී ඇති අතර ප්‍රදේශවාසීන් මේ සම්බන්ධව රිදීමාලියද්ද ප්‍රාදේශීය සභා ලේකම්වරියට කිහිපවතාවක්ම දැනුම්වත් කළ ද ප්‍රාදේශීය සභා ලේකම්වරිය මෙය නොසලකා හැර ඇති බවට ප්‍රදේශවාසීන් චෝදනා කරයි.
බදුල්ල – මහියංගණ, බිබිල – මහියංගණ, ආඳාඋල්පත – බටුයාය යන මාර්ගය බෙදන හතරමං හන්දියක් සමඟ ඉතා අලංකාර නගරයක් වන ආඳාඋල්පත නගරය කෙටි කාලයක් තුළ සංවර්ධනය වෙමින් පවතින අතර මෙවැනි වේලාව නැවති ඇති ඔරලෝසු කණුවකින් නගරයේ පාළු ස්භාවයක් දිස්වෙන අතර මේ සඳහා අදාළ බලධාරින්ගේ අවධානය යොමුකර මෙම ඔරලෝසු කණුව අලුත්වැඩියා කර දෙන ලෙස ප්‍රදේශවාසීහු ඉල්ලා සිටිති.
