රුපියල් ලක්ෂ දහසයක් වටිනා එනසාල් කිලෝග්‍රෑම් 117ක්, නීතිවිරෝධී ලෙස මෙරටට රැගෙන විත්, ඒවා කටුනායක ගුවන් තොටුපොළෙන් පිටකර ගෙනයමින් සිටි ගුවන් මගීන් දෙදෙනකු පසුගියදා (5) ගුවන් තොටුපොළ පොලීසියේ නිලධාරීන් පිරිසක් විසින් අත්අඩංගුවට ගැනිණි.
මෙම ගුවන් මගීන් දෙදෙනා අවුරුදු 41 සහ 49 යන වයස්වල පසුවන කොළඹ – 13 සහ කොළඹ – 8 යන ප්‍රදේශවල පදිංචි, නිතර නිතර ගුවන් ගමන්වල නිරත වෙමින් ව්‍යාපාරික කටයුතුවල යෙදෙන්නන් බව අනාවරණය විය. මොවුන් දෙදෙනා 5 වැනි දින අලුයම 04.50ට ඉන්දියාවේ බැංගලෝර් නුවර සිට ශ්‍රී ලන්කන් ගුවන් සේවයේ යූ.එල්. – 174 දරන ගුවන් යානයෙන් කටුනායක ගුවන් තොටුපොළ වෙත පැමිණ තිබුණි. ඔවුන් විසින් ගෙන එන ලද ගමන් මලු 7ක් තුළ මෙම එනසාල් තොගය කිලෝග්‍රෑම් 1 සහ 3 වශයෙන් අඩංගු පැකට් වශයෙන් සකස් කර, සඟවාගෙන පැමිණ තිබේ.
මේ පිළිබඳ වැඩිදුර විමර්ශන කටයුතු සඳහා අත්අඩංගුවට ගත් දෙදෙනා කටුනායක නයිකන්ද රේගු නිවාරණ කාර්යාලය වෙත භාර දීමට පියවර ගෙන ඇත.
