බොරැල්ල කාසල් පාරේ ප්‍රසිද්ධ උත්සව ශාලාවක මෝස්තර නිරූපණ ශිල්පී චන්දිමාල් ජයසිංහ මහතා විසින් පවත්වන ලද 2025 වසරේ අලුත් අවුරුදු කුමර කුමරියන් තේරීමේ තරගය අතරතුරදී ඇති වූ හදිසි ගින්නකින් රුපියල් ලක්ෂ ගණනාවක අලාභයක් සිදුව ඇතැයි බොරැල්ල පොලීසිය පැවසීය.
පොලීසිය සඳහන් කළේ, ඊයේ අලුයම 12.30ත් 01 .00ත් අතර කාලයේදී මෙම ගින්න හටගෙන ඇති අතර, විනාඩි කිහිපයක් තුළදී ගින්න උත්සව ශාලාවන් 2ක් පුරා පැතිර ගොස් ඇති බවයි.
ගින්න හටගන්නා අවස්ථාවේදී එම ශාලාවන් තුළ පුද්ගලයන් 500කට ආසන්න පිරිසක් රැඳී සිට ඇති අතර, ගින්නෙන් කිසිවකුටත් හානියක් සිදුව නැත. එම ගින්න හේතුවෙන් විදුලි ආලෝක පද්ධතියට, කැමරා කිහිපයකට ශාලාවල රැඳී සිටි පුද්ගලයන් අසුන්ගෙන සිටි පුටුවලට ඇතුළු දේපොළ රැසකට සම්පූර්ණ හානි සිදුව තිබේ.
කොළඹ මහ නගර සභාවේ ගිනි නිවන රථ හතරක් මෙන්ම කෝට්ටේ නගර සභාවේ ගිනි නිවන රථ දෙකක් ඇතුළු ගිනි නිවන නිලධාරීන් 25 දෙනකුට අධික පිරිසක් පැමිණ පැය දෙකකට ආසන්න කාලයක දැඩි පරිශ්‍රමයකින් අනතුරුව ගින්න නිවා දැමීමට කටයුතු කර ඇත. ගින්නට හේතුව වායු සමීකරණ යන්ත්‍රයකින් ඇතිවූ යම් දෝෂයක් ද වෙනයම් හේතුවක් ද යන්න සොයා අපරාධ ස්ථාන පරීක්ෂණ නිලධාරීන් සහ රජයේ රස පරීක්ෂක කැඳවා පරීක්ෂණ පවත්වන බව පොලීසිය පැවසීය.
