කලක පටන් දිවයිනේ විවිධ ස්ථානවලින් යතුරුපැදි සොරකම් කර, ඒවා කොටස් කර අලෙවි කිරීමේ ජාවාරමක නිරත වූ එකම පවුලේ පියා, පුතු සහ ලේලිය ඇතුළු සැකකරුවන් පස් දෙනකු නවගමුව පොලීසිය මඟින් අත්අඩංගුවට ගැනිණි.
මෙහි ප්‍රධාන සැකකරු මුල්ලේරියාව ප්‍රදේශයේ මෝටර් රථ අමතර කොටස් වෙළෙඳසලක් පවත්වාගෙන යන අතර, සිය පුත්‍රයා හා ලේලිය විසින් සොරකම් කරගෙන එනු ලබන යතුරුපැදි කොටස් ගලවා අළෙවි කොට තිබේ. මොවුන් සොරකම් කළ යතුරුපැදි හයක් පොලීසිය සොයාගෙන ඇති අතර, නවගමුව පොලිස් වසමේ යතුරුපැදි තුනක්, කැලණිය පොලිස් වසමේ යතුරුපැදි දෙකක්, තලංගම පොලිස් වසමේ යතුරුපැදියක් ඒ අතර වේ.
පොලීසිය සී.සී.ටී.වී. දර්ශන ද උපයෝගී කරගෙන සිදු කළ දීර්ඝ විමර්ශනයකින් අනතුරුව සැකකරුවන් අත්අඩංගුවට ගෙන තිබේ. සැකකරුවන් කඩුවෙල මහේස්ත්‍රාත් අධිකරණයට ඉදිරිපත් කිරීමෙන් අනතුරුව සැකකාර පියා සහ ඔහුහේ සහායකයකු ලෙස කටයුතු කළ අයකු රක්ෂිත බන්ධනාගාර ගත කළ අතර, පුත්‍රයා, ලේලිය ඇතුළු තිදෙනකු ඇප මත මුදා හැර ඇත.
