“අලි ඇතුන් ඇතුළු සතා සිවුපාවුන්ගේ මූලික අවශ්‍යතාවක් වන ජල හිමිකම වෙනුවෙන්, සතා සිවුපාවන්ගේ සාධාරණය උදෙසා පුත්තලමේ රාජ්‍ය හා දේශපාලන මහ පුටු රත්වූ දුර්ලභ අවස්ථාවක්” පසුගිය දා පුත්තලමේ දී දැකිය හැකි විය.
පුත්තලම දිස්ත්‍රික්කයේ තබ්බෝව වන රක්ෂිතයේ ජීවත්වන අලි ඇතුන් ඇතුළු සතා සිවුපාවුන්ගේ පිපාසාව නිවීමට දිය බිඳක් සැපයූ, දැනට මහත් සේ ගිලන්ව ඇති මහසෙන් වැව හෙවත් කඩහලක වැවේ වත්මන් තත්ත්වය නිරීක්ෂණය සඳහා පුත්තලමේ ඉහළපෙළේ රාජ්‍ය නිලධාරීන් සහ දේශපාලන අධිකාරීයේ පිරිසක් පසු ගිය දා චාරිකාවකට එක්වූහ.
මෙම වැව පිහිටා ඇත්තේ පුත්තලම දිස්ත්‍රික්කයේ වනාතවිල්ලුව ප්‍රාදේශීය ලේකම් කොට්ඨාසයේ මයිලන්කුලම ග්‍රාම නිලධාරි වසමේ තබ්බෝව වන රක්ෂිතය තුළය. අනුරාධපුර යුගයට අයත් යැයි සැලකෙන මෙම වැව වන සතුන්ගේ ප්‍රධානතම ජලමූලාශ්‍රයකි.
මේවනවිට වැවේ පැති බැම්මකට හානි සිදුවීමෙන් ජලය රඳා පැවතීමේ ධාරිතාව ගිලිහී යමින් පවතියි. එහෙයින් වැවේ වත්මන් තත්ත්වය නීරීක්ෂණය කොට ප්‍රතිසංස්කරණය සඳහා අවශ්‍ය පිඹුරුපත් සැකසීම මෙම චාරිකාවේ අරමුණ විය.
වන රක්ෂිතය තුළට ගමන් කිරීම බෙහෙවින්ම අසීරු කාර්යයක් විය. ට්‍රැක්ටරය ගමන් සගයා විය. කැලෑව එළිපෙහෙළි කර ගනිමින්, විටෙක මඩේ එරෙමින් දුෂ්කර ගමනාන්තයකින් මහසෙන් වැවට ළඟාවීමට හැකි විය. මෙම චාරිකාවට පුත්තලම දිසා ලේකම් එස්.එම්.පී. සුනන්ද හේරත්, රාජ්‍ය පරිපාලන හා ස්වදේශීය කටයුතු අමාත්‍ය මහාචාර්ය චන්දන අබේරත්න, පරිසර නියෝජ්‍ය අමාත්‍ය ඇන්ටන් ජයකොඩි මහතා ද එක්ව සිටියහ.
මෙම නිරීක්ෂණ චාරිකාවේ ප්‍රගතිය පිළිබඳව අප කළ විමසීමේ දී පුත්තලම දිසා ලේකම් එස්.එම්.පී. සුනන්ද හේරත් මහතා පැවසුවේ,
මෙම වැව සම්බන්ධයෙන් අදාළ ආයතන වන වාරි මාර්ග, පරිසර අමාත්‍යංශය, වනජීවී, වන සංරක්ෂණ ආදී සියලු රාජ්‍ය ආයතන හා සාකච්ඡාවක් පවත්වනවා. ඔවුන්ගේ එකඟතා, ගැටලු එකම මේසයක සාකච්ඡාවට බඳුන්කොට වඩාත් ඵලදායී සැලසුමකට එළඹීම ඔවුන්ගේ අදහසක බවත් ලෝක බැංකු ආධාර උපයෝගී කරගනිමින් වඩාත් කඩිනමින් හා සාර්ථකව මෙම සද් කාර්යය ඉටු කිරීම බලාපොරොත්තුව වන බවත්ය.Ó
සතුන්ගේ සා පිපාසාව නීවීම, අලි ඇතුන් ගම් වැදීම අවමවීම, ගොවීන්ට ද සිය ජල අවශ්‍යතා සපිරීම මෙම වැව ප්‍රතිසංස්කරණයෙන් හිමිවන අනෙකුත් ප්‍රතිලාභයන් ය.
