ගම්පොළ, පුස්සැල්ලාව, වහුගපිටිය දිසා රෝහලේ පරිපාලනය බිඳ වැටීමෙන් වතු හතළිහක ජනතාව ඇතුළු හැටදහසක ජනතාවක් දැඩි පීඩනයට පත්ව ඇතැයි පවසා රෝහල් පරිපාලනයට විරුද්ධව එම රෝහල ඉදිරිපිට දී ගම්පොළ – නුවරඑළිය මාර්ගය වසා වතු ජනතාව පෙරේදා (05) විරෝධතාවක් දැක්වූහ.
මෙම විරෝධතාකරුවන් ගම්පොළ – නුවරඑළිය මාර්ගය එම රෝහල අසලින් අවහිර කරමින් මාර්ගයේ වැතිර පවසා සිටියේ රෝහලේ ස්ථාන භාර වෛද්‍යවරයා මාරු කර රෝහලේ අඩුපාඩු සකසා දෙන ලෙසයි.
මොවුන්ගේ දැඩි චෝදනාව වූයේ රෝහලේ ස්ථාන භාර වෛද්‍යවරයා දිනය පුරා දැඩි ලෙස බීමත්ව සිටීමෙන් රෝහල් පරිපාලනය බිඳවැටීමට හේතු වී ඇති බවයි.
මහනුවර දිස්ත්‍රික්කයේ මායිමේ හා නුවරඑළිය දිස්ත්‍රික්කයේ ආරම්භක ප්‍රදේශයේ නගර තුනක් ඇතුළු වතු 40ක ජනතාවට ඇති මෙම රෝහල තුළ තමන්ට මහත් අසාධාරණයක් සිදුවන බව ඔවුහු පවසති.
මෙම රෝහලේ ඖෂධවේදීන් දෙදෙනකු සිටිය යුතු වුවද මාස ගණනාවක සිට එකදු ඖෂධවේදියකු හෝ නොමැතිව තමන් මහත් අපහසුතාවට පත් වූ බවත් මේ නිසාම අධික මුදලක් ගෙවා පෞද්ගලික අංශවලින් ඖෂධ ගැනීමට සිදුවූ බවත් මොවුහු පෙන්වා දෙති.
රෝහලේ මෝචරියේ පුහුණු සේවකයකු නොමැති අතර කාර්ය මණ්ඩලයේ අඩුපාඩු නිසා ජනතාවට අපහසුතා ඇතිවන බව ද ඔවුහු සඳහන් කරති.
නිසි වෙලාවට ගිලන් රථ රියැදුරන් හා සේවකයන් නොමැතිකම හා රෝහලේ නොසැලකිල්ල නිසා මෑතකාලයේ තිදෙනකු මියගිය බව ද මොවුහු පවසති.
ඒ ආකාරයට පුස්සැල්ලාව හින්දු විද්‍යාලයේ සිසුවකුගේ හිසේ විදුලි පංකාවක් වැදී තුවාල වූ අවස්ථාවේ රෝහලේ නොසැලකිල්ලෙන් ඔහු මියගිය බවත් පවසා මේ ලෙසම එදා විශාල වතු ජනතාවක් මාර්ගය හරස් කර විරෝධතා දක්වුව ද අදට ද එම ගැටලුවලට විසඳුම් නොලැබී ඇති බව ද විරුද්ධාකරුවෝ පවසති.
පුස්සැල්ලාව පොලිස් ස්ථානාධිපති ප්‍රධාන පොලිස් පරීක්ෂක ඉන්දික හේමකුමාර මහතා ඇතුළු පොලිස් කණ්ඩායමක් පැමිණ වසා ඇති මාර්ගය වාහන ධාවනයට විවෘත කරදී මොවුන්ට පළාත් අධ්‍යක්ෂක වරයා සමඟ සාකච්ඡාවක් රැගෙන දීමට පොරොන්දු වූ පසු උද්ඝෝෂකයෝ විසිර ගියහ.
