ජාතික ජන බලවේගයේ කෑගල්ල දිස්ත්‍රික් පාර්ලිමේන්තු මන්ත්‍රී කෝසල ජයවීර මහතා (38) හදිසියේ හට ගත් හෘදයාබාධයක් හේතුවෙන් කරවනැල්ල මූලික රෝහලේදී ඊයේ (06) අභාවප්‍රාප්ත විය.
කෑගල්ල ගුරුල්ලවල කණිෂ්ඨ විද්‍යාලයෙන් මූලික අධ්‍යාපන ලැබූ කෝසල ජයවීර මහතා පසුව ඇහැලියගොඩ ජාතික පාසලෙන් අධ්‍යාපනය හදාරා අපොස උසස් පෙළ හදාරා විවෘත විශ්වවිද්‍යාලයේ ඉංජිනේරු පිඨයට ඇතුළත්ව උපාධිය හැදෑරීය. කෝසල ජයවීර මහතා විශ්වවිද්‍යාලයේ ශිෂ්‍ය සංගමයේ සභාපතිවරයා ලෙස ද සමාජවාදී ශිෂ්‍ය සංගමයේ ජාතික කමිටු සමාජිකයකු ලෙස ද කටයුතු කර තිබේ.
ජනතා විමුක්ති පෙරමුණේ දෙහිඕවිට ප්‍රාදේශීය සභාවේ මන්ත්‍රීවරයකු ලෙස කටයුතු කළ ඒ මහතා, සමාජවාදී තරුණ සංගමයේ කෑගල්ල දිස්ත්‍රික් සංවිධායකවරයා ලෙසද, ජාතික ජන බලවේගයේ කෑගල්ල දිස්ත්‍රික් විධායක සභික රුවන්වැල්ල ආසන සංවිධායකවරයා ලෙස ද කටයුතු කළේය. වසර 12ක දේශපාලන අත්දැකීම් ඇති කෝසල ජයවීර මහතා දක්ෂ නිර්මාණශීලී තරුණයකු ලෙස කැපී පෙනුණ අයෙකි. දේහය පිළිබඳ අවසන් කටයුතු පසුව දැනුම් දෙනු ලැබේ.
