මෝදර,මට්ටක්කුලිය ප්‍රදේශයේ හිසකෙස් වර්ණක ව්‍යාජ ලෙස සකස් කරමින් තිබූ ස්ථානයක් පාරිභෝගික කටයුතු පිළිබඳ අධිකාරිය විසින් පසුගියදා(02) වටලනු ලැබීය. ඒ පාරිභෝගික අධිකාරියට ලද පැමිණිල්ලකට අනුවය. දිවයිනේ ප්‍රසිද්ධ වෙළෙඳ නාමයක් වන එම නිෂ්පාදනයේ සත්‍ය හිමිකරු විසින් ග්‍රෑම් 21ක අසුරණවලින් තම නිෂ්පාදන වෙළෙඳපොළට ඉදිරිපත් කළ ද ව්‍යාජ සැපයුම්කරු විසින් සත්‍ය නිෂ්පාදකයාගේ නම, ලිපිනය ඇතුළු තොරතුරු සහ ආරක්‍ෂිත ස්ටිකරයේ තොරතුරු ඒ ආකාරයෙන්ම ඇතුළත් කරමින් ව්‍යාජ ලෙස සකස් කරන ලද ග්‍රෑම් 7,8,9,10 ප්‍රමාණවලින් එම හිසකෙස් වර්ණක වෙළෙඳපොළට නිකුත් කර තිබිණි.
ඒ අනුව නීති විරෝධී ලෙස කටයුතු කරමින් ආනයනය කරන ලද වෙනත් නිෂ්පාදනයක්, සත්‍ය නිෂ්පාදකයාගේ හිසකෙස් වර්ණක සමඟ මිශ්‍ර කරමින් වසර ගණනාවක් මේ ව්‍යාපාරය කරගෙන ගොස් තිබේ. අදාළ ව්‍යාජ නිෂ්පාදනයේ ඇමෝනියා අඩංගු නොවන බව සඳහන් කර තිබුණ ද ඒ සම්බන්ධව තවදුරටත් විමර්ශන සිදු කරන අතර වැටලීමේදී නිලධාරීන් භාරයට ගනු ලැබූ වෙළෙඳපොළ වටිනාකම රුපියල් මිලියන 28ක් පමණ වන ව්‍යාජ නිෂ්පාදන අඩංගු ඇසුරුම් 130,000ක තොගය ඉදිරියේදී අධිකරණයට ඉදිරිපත් කර, නඩු පැවරීමට නියමිත බව පාරිභෝගික කටයුතු පිළිබඳ අධිකාරිය පැවසීය.
