ජපානයේ සහ කොරියාවේ රැකියා ලබා දෙන බව සඳහන් කරමින් පවත්වාගෙන යන පෞද්ගලික වැඩසටහනකට වයඹ පළාත් සභාවේ සභාපති ටිකිරි අධිකාරි මහතා පළාත් සභාවේ රාජ්‍ය ලිපි ශීර්ෂ අයථා ලෙස භාවිත කරමින් සිටින බවට ජාතික ජනබලවේගය පක්ෂයේ කුරුණෑගල දිස්ත්‍රික්කයේ පාර්ලිමේන්තු මන්ත්‍රීවරුන් වයඹ පළාත් ආණ්ඩුකාර තිස්ස වර්ණසූරිය මහතාට දැනුම්දීමට පියවර ගෙන ඇත.
පොල්ගහවෙල ආසනය නියෝජනය කරමින් විපක්ෂයට සම්බන්ධව දේශපාලනයේ නියැළී සිටින සභාපති ටිකිරි අධිකාරි මහතා මෙවැනි පෞද්ගලික කර්තව්‍යයක් සඳහා පළාත් සභාවේ ලිපි ශීර්ෂ භාවිත කිරීම නීතිවිරෝධී කාරණයක් බව ඔවුන් පෙන්වා දී ඇත. ඔහු තමන්ගේ නමින් පෞද්ගලිකව පවත්වාගෙන යන පදනමක් වෙනුවෙන් පළාත් සභාවේ ලිපි ශීර්ෂ මෙලෙස අයථා ලෙස යොදා ගනිමින් සිටින බවට ඔවුහු චෝදනා කරති.
ජපන් හා කොරියානු රජයන් විසින් ලබා දෙන රැකියා සඳහා සංවිධාන කරන භාෂා පාඨමාලාවට සහභාගිවන්නන්ට ශිෂ්‍යත්ව ප්‍රදානයන් ලබාදෙන බව ද එම ලිපි මඟින් දන්වා ඇති බව ද කියති. ජපන් සහ කොරියා රැකියා බලාපොරොත්තු වන අයට නොමිලේ භාෂා පුහුණුව ලබා දෙන බවත් තම පදනමේ සම්මන්ත්‍රණවලට සහභාගි වන ජපානයේ සහ කොරියාවේ රැකියාවලට යාමට කැමති අයගේ අයැදුම්පත් එහිදී බාර ගන්නා බවත් එම ලිපි මඟින් දැනුම් දී ඇතැයි ද පැවසේ.
මේ කරුණ සම්බන්ධයෙන් වයඹ පළාත් සභාවේ ප්‍රධාන ලේකම් ඉන්දික ඉලන්කෝන් මහතාගෙන් කළ විමසීමකදී ඔහු පැවසුවේ මේ සම්බන්ධයෙන් මේ වනවිට තමන්ට ද පැමිණිලි කිහිපයක්ම ලැබී ඇති බැවින් ඒ පිළිබඳව වයඹ පළාත් ආණ්ඩුකාරවරයා දැනුම්වත් කිරීමට පියවර ගත් බවය.
මීට වසර කීපයකට පමණ ඉහතදී ද මේ අකාරයටම වයඹ පළාත් සභාවේ ලිපි ශීර්ෂ අයථා ලෙස භාවිත කරමින් පෞද්ගලික සම්මන්ත්‍රණ පැවැත්වීම පිළිබඳවද මේ සභාපතිවරයාට එරෙහිව චෝදනා එල්ල විය. මේ සම්බන්ධයෙන් අදහස් දැක්වූ වයඹ පළාත් සභාවේ උසස් නිලධාරියෙක් කියා සිටියේ මෙලෙස පළාත් සභාවේ ලිපි ශීර්ෂ තම පෞද්ගලික කටයුත්තකට යොදා ගැනීම නීතිවිරෝධී මෙන්ම සදාචාර විරෝධී ක්‍රියාවක් ද වන බවයි. මේ කරුණ සම්බන්ධයෙන් ජාතික ජනබලවේගයේ නියෝජිතයන් පිරිසක් අද (7) ආණ්ඩුකාරවරයා හමුවී සාකච්ඡා කිරීමට නියමිතය.
