ශ්‍රී ලාංකේය ජනතාව වෙත දක්වන මිත්‍රත්වය සහ සහයෝගිතාව අගයමින් මිත්‍ර විභූෂණ සම්මානයෙන් පිදුම් ලැබීම තමාට මහත් ගෞරවයක් බවත්, එය හුදෙක් තමාගේ නොව කෝටි 140ක් වූ ඉන්දියානු ජනතාවට ලැබුණු සම්මානයක් බවත්, ඒ පිළිබඳව ජනාධිපතිවරයාට, ශ්‍රී ලංකා රජයට හා ජනතාවට තම ආචාරය පුද කරන බවත් ඉන්දියානු අගමැති ශ්‍රී නරේන්ද්‍ර මෝදි මහතා පැවසීය.
ඉන්දියානු අගමැති ශ්‍රී නරේන්ද්‍ර මෝදි මහතා මේ බව ප්‍රකාශ කළේ ජනාධිපති අනුර කුමාර දිසානායක මහතා සමඟ පෙරේදා (05) ජනාධිපති කාර්යාලයේ පැවති නිල හමුවෙන් අනතුරුව පැවති ඒකාබද්ධ මාධ්‍ය සාකච්ඡාවේදීය.
‘තිරුවලුවර්’ නම් කවියාගේ වදනක් උපුටා දක්වමින් ශ්‍රී නරේන්ද්‍ර මෝදි මහතා පෙන්වා දුන්නේ සත්‍ය මිතුරකු සහ ඔහුගේ මිත්‍රත්වයට වඩා වෙනත් සුරක්ෂාවක් නැති බවයි.
ඒ අනුව ජනාධිපති අනුර කුමාර දිසානායක මහතා ඔහුගේ පළමූ විදෙස් සංචාරයට ඉන්දියාව තෝරා ගැනීම දෙරට අතර පවතින ගැඹුරු මිත්‍රත්වයේ පිළිබිඹුවක් බවත්, ශ්‍රී ලංකා ජනාධිපතිවරයාගේ පළමු විදෙස් මිතුරා වන්නට තමන්ට අවස්ථාව ලැබුණු බවත් ඉන්දියානු අග්‍රාමාත්‍යවරයා ප්‍රකාශ කළේය.
භාරතයේ (සබ්බා සාත් – සබ්බා විකාස්) දැක්ම අනුව, තමන් අසල්වැසි දේශයන්හි ප්‍රගතියට සහාය ලබාදෙන බවත්, ඒ අනුව ශ්‍රී ලංකාව සමඟ ණය ප්‍රතිව්‍යුහගතකරණයේදී පොලී අනුපාත අඩු කිරීමට තීරණය කර ඇති බවත් පැවසූ ඉන්දියානු අග්‍රාමාත්‍යවරයා, එමඟින් ශ්‍රී ලංකාවේ ජනතාවට සහනදායි තත්ත්වයක් ලැබෙනු ඇති බවද ප්‍රකාශ කළේය.
භාරතය සහ ශ්‍රී ලංකාව අතර සියවස් ගණනක ආධ්‍යාත්මික සහ ආත්මීය සබඳතාවක් ඇති බව ද, එය තහවුරු කරමින් 1960දී ගුජ්රාට්වලින් හමු වූ බුදුන් වහන්සේගේ ධාතු බැතිමතුන්ට වැඳපුදා ගැනීමට සැලැස්වීමට බලාපොරොත්තු වන බව ද ශ්‍රී ලංකාවට වැඩම කරවීමට කටයුතු කරන බව ද ඉන්දීය අග්‍රාමාත්‍යවරයා පැවසීය.
එසේම ත්‍රිකුණාමලය තිරුකෝනේෂ්වරම්, අනුරාධපුර පූජනීය නගරය, සීතාඑළිය කෝවිල යන ආගමික සිද්ධස්ථාන ප්‍රතිසංස්කරණය කිරීමට ඉන්දියාවේ සහාය ලබා දෙන බව ද ශ්‍රී නරේන්ද්‍ර මෝදි මහතා වැඩිදුරටත් සඳහන් කළේය.
භාරතය සහ ශ්‍රී ලංකාව අතර ඓතිහාසික සබඳතාවක් සහ ගැඹුරු මිත්‍රත්වයක් ඇති බවත්, 2019 වසරේදී ගියවර සිදුවූ සංචාරය අතිශය සංවේදී කාලයක සිදුවූ බවත් පෙන්වා දුන් අග්‍රාමාත්‍යවරයා, අගමැති ලෙස මෙය තමාගේ 4 වැනි ශ්‍රී ලංකා සංචාරය බවත් සිහිපත් කළේය.
ජනතාවගේ නිර්භීතභාවය හා ධෛර්යය පිළිබඳව තමා දැන සිටි හෙයින් ශ්‍රී ලංකාව වඩා ශක්තිමත්ව යළි ගොඩනැඟෙනු ඇතැයි කියා තමා විශ්වාස කළ බවත් එහිදී ඉන්දියානු අග්‍රාමාත්‍යවරයා පැවසීය. ශ්‍රී ලංකාව නැවත ප්‍රගතියේ මාවතට ප්‍රවිෂ්ට වී සිටිනු දැක තමා සතුටට පත්වන බව ද මෝදි මහතා පෙන්වා දුන්නේය. භාරතයට සාඩම්බරයට කාරණයක් වනුයේ ගෞරවාන්විත මිත්‍රයකුගේ ස්වරූපයෙන් ඉටු කළයුතු යුතුකම ඉටු කිරීමට හැකිවීම බව ද, 2019 පාස්කු ඉරුදින ත්‍රස්ත ප්‍රහාරය, කොවිඩ් වසංගතය සහ පසුව පැමිණි ආර්ථික අර්බුදය යන සියලු අවස්ථාවන්හි තම රජය ශ්‍රී ලංකා ජනතාව සමඟ එකට එක්ව සිට කටයුතු කළ බව ද ඉන්දියානු අග්‍රාමාත්‍යවරයා සඳහන් කළේය.
භාරතයේ අසල්වැසියා පළමු ප්‍රතිපත්තිය තුළ හා මහාසාගර් දැක්ම තුළ ශ්‍රී ලංකාවට විශේෂ ස්ථානයක් හිමිවන බවත් පැවසූ මෝදි මහතා ජනාධිපති අනුර කුමාර දිසානායක මහතාගේ ඉන්දියානු සංචාරයෙන් පසු පසුගිය මාස 4ක කාලයේ දෙරට අතර සහයෝගිතාවයේ ඉහළ ප්‍රගතියක් ඇතිවූ බව ද පැවසීය. සාම්පූර් සූර්ය බලාගාර ව්‍යාපෘතියේ සිට ත්‍රිකුණාමලය බලශක්ති මධ්‍යස්ථානයක් ලෙස ස්ථාපනය කිරීම දක්වා දෙරට අතර ඇතිවූ සහයෝගිතාවල ප්‍රතිලාභ ශ්‍රී ලංකාවේ සියලු ජනතාවට ලැබෙනු ඇතැයි ද ඉන්දියානු අග්‍රාමාත්‍යවරයා මෙහිදී කියා සිටියේය.
අධිවෝල්ටීය ජාල සබඳතාව පිළිබඳ සහයෝගීතාවෙන් ශ්‍රී ලංකාවට විදුලිය අපනයනය කිරීමට අවස්ථාවක් උදාවනු ඇති බව ද, ශ්‍රී ලංකාවේ ආගමික ස්ථානවල සූර්ය පැනල 5000ක් ස්ථාපනය කිරීමට ලැබීම මහත් සතුටක් බව ද මෝදි මහතා පැවසීය.
ශ්‍රී ලංකාවේ ඩිජිටල්කරණ ව්‍යාපෘතියට ද ඉන්දියාවේ සහාය ලබාදෙන බව ද, ජනතාවගේ ආර්ථික හා සමාජයීය දියුණුව වෙනුවෙන් ශ්‍රී ලංකා රුපියල් බිලියන 2.4ක ප්‍රදානයක් ලබාදීමටත් තමා කටයුතු කළ බව ද පැවසූ ඉන්දියානු අග්‍රාමාත්‍යවරයා, ගොවීන්ගේ යහපත උදෙසා ශ්‍රී ලංකාවේ විශාලතම කෘෂි ගබඩා සංකීර්ණය ඉදිකිරීමට ඉන්දියානු රජය සහාය ලබා දුන් බව ද පෙන්වා දුන්නේය.
නවීකරණය කළ මහව – ඕමන්ත දුම්රිය මාර්ගය මෙන්ම මහව – අනුරාධපුර දුම්රිය සංඥා පද්ධතිය ජනතා අයිතියට පත් කිරීමට තමා සහභාගි වන බවත්, ශ්‍රී ලංකාවේ ඉන්දියානු සම්භවයක් ඇති දමිළ ජනතාව වෙනුවෙන් නිවාස 10,000ක් ඉදිකිරීමට සහ ශ්‍රී ලංකාවේ විවිධ ක්ෂේත්‍ර නියෝජනය කරන යොවුන් නායකයන් 700කට යහපාලන පුහුණු වැඩසටහන් සඳහා ඉන්දීය රජයේ සහාය ලබා දෙන බවත් ඒ මහතා ප්‍රකාශ කළේය. ශ්‍රී ලංකා රාජ්‍ය සංචාරය අතරතුර ඉහළ රාජ්‍ය ගෞරව සහිතව හරසරින් පිළිගැනීම ගැන ජනාධිපති අනුර කුමාර දිසානායක මහතා ඇතුළු රජයට සිය ස්තුතිය පුද කර සිටින බව ද මෝදි අග්‍රාමාත්‍යවරයා වැඩිදුරටත් පැවසීය.
