යහපාලන ආණ්ඩුව සමයේ ඉන්දීය රජයේ මුදල් ප්‍රදානයක් සහිතව ඉදිකිරීම් ඇරඹූ දඹුල්ල උෂ්ණත්වය සහ තෙතමනය පාලිත කෘෂි ගබඩා සංකීර්ණය විවෘත කිරීම සම්බන්ධයෙන් අවංකවම සතුටු වන බව පාර්ලිමේන්තු මන්ත්‍රී හර්ෂ ද සිල්වා මහතා පවසයි.
“ප්‍රභාෂ්වර – ගොවි දිවියේ නව්‍ය හැරවුම” නමින් යහපාලන ආණ්ඩු සමයේදී මෙම ගබඩා සංකීර්ණයේ ඉදිකිරීම් ඇරඹුවේ ගොවීන්ගේ එළවළු සහ පලතුරු අස්වැන්න අවශ්‍ය විට ගබඩා කරමින් කළමනාකරණය කිරීම වෙනුවෙන් මෙට්‍රික් ටොන් 5000ක ධාරිතාවයෙන් යුත් උෂ්ණත්වය සහ තෙතමනය පාලිත මෙරට පළමු කෘෂි ගබඩා සංකීර්ණය ලෙස බව ද ඒ මහතා පෙන්වා දෙයි.
මෙම ගබඩා සංකීර්ණය ඉදිරියට රැගෙන යෑම සඳහා අවශ්‍ය ව්‍යාපාරික සැලසුම ද සකස් කර තිබූ නමුත් යහපාලන ආණ්ඩුව පරාජය වීම හේතුවෙන් ව්‍යාපෘතිය අවසන් කිරීමට නොහැකි වූ බවත් පසුව බලයට පැමිණි ආණ්ඩුවලට මෙම කෘෂි ගබඩා සංකීර්ණයේ ඉදිකිරීම් අවසන් කිරීමේ සැබෑ වුවමනාවක් නොතිබිණි.
මෙම ශීතාගාර සංකීර්ණය විවිධ උෂ්ණත්ව සහ තෙතමන මට්ටම්වලින් යුත් කොටස් හයකින් සමන්විත අතර අස්වැන්න වැඩි කාලයට සහන මිලකට මෙම ශීතාගාරයේ සිය අස්වැන්න ගබඩා කිරීමේ අවස්ථාව ගොවි ප්‍රජාවට හිමි වන ලෙස සැකසුණු මෙම ව්‍යාපෘතිය යථාර්ථයක් කිරීමට වත්මන් ජනාධිපතිවරයාට හැකිවනු ඇතැයි ද ඒ මහතා වැඩිදුරටත් සඳහන් කරයි.
