නිල්වලා ගඟ හරහා ඉදිකර ඇති ලවණ බාධකය හේතුවෙන් මතුව ඇති ගැටලු සඳහා දීර්ඝ කාලීන විසඳුමක් දෙන තෙක් ප්‍රදේශයේ වාරි ගැටලු විසඳීමට කෙටි කාලීන පියවර රැසක් යෝජනා වී ඇත.
ඒ පිළිබඳව පසුගියදා ජනාධිපති ලේකම්, ආචාර්ය නන්දික සනත් කුමානායක මහතා සහ මේ ගැටලුව හා සම්බන්ධ සියලුම අමාත්‍යාංශ සහ ආයතනවල නිලධාරීන් අතර ජනාධිපති කාර්යාලයේ පැවැති සාකච්ඡාවේදී මේ යෝජනා කඩිනමින් ක්‍රියාවට නැංවීමට එකඟතාව පළ කෙරිණි.
ඒ අනුව ලවණ බාධකය ඉදිකිරීමේදී ඉවත් කළ පස් ගඟ අසල ඉඩමක ගොඩගසා ගංවතුර සමයේ ජලය පහසුවෙන් බැස යෑමට හැකි වන පරිදි ඉවත් කිරීම, ලවණ බාධකය දෙපස ඉදිකර ඇති Sheet File බාධකයේ උස අඩු කර ජලය පහසුවෙන් බැස යෑමට සැලැස්වීම, ගඟ පතුලෙහි පිරී ඇති වැලි ඉවත් කිරීම, ජල මාර්ග අවහිර වන සේ සැකසී ඇති බාධා ඉවත් කර පහසුවෙන් ජලය බැස යෑමට හැකි වන පරිදි අතුරු ඇළ මාර්ග පිරිසුදු කිරීම සහ කුඹුරුවල පිරෙන ජලය ඉවත් කිරීමට ඉදිකර ඇති ජල පොම්පාගාර නිසි පරිදි නඩත්තු කිරීමට කටයුතු කෙරෙනු ඇත.
එසේම මාතර හිත්තැටිය, මැද රවුම් පාරේ ජීවත්වන ගම්වාසීන්ගේ අතුරු මාර්ග, ඉඩම් සහ නිවාස වැසි කාලයේදී ජලයෙන් පිරී යෑමට හේතු වන කානු පද්ධතියේ ගැටලුවට අදාළව ඉදිරියේදී දිගු කාලීන විසඳුමක් ගැනීමට අපේක්ෂාවෙන්, ඉදිරියේදී ඇති විය හැකි වැසි තත්ත්වය සලකා කෙටි කාලීන විසඳුම් කිහිපයක් ද යෝජනා වී ඇත.
හිත්තැටිය 1 කණුව සිට දහනායක මාර්ගය ඔස්සේ පැමිණෙන ජලය, රවුම් පාරෙහි කානු පද්ධතිය වෙත සම්බන්ධ කර ඇති කොටස ඉවත් කර එම ස්ථානයේ සිට නූපේ ඇළ දක්වා දහනායක මාර්ගය ඔස්සේ ජලය බැස යෑමට නව කානු පද්ධතියක් සකස් කිරීම සහ දැනට පවතින කානු පද්ධතියේ ධාරිතාව වැඩිකොට සංවර්ධනය කිරීමට ඒ අනුව කටයුතු කෙරෙනු ඇත.
හිත්තැටිය මැද රවුම් පාරෙහි ජලය ගලා බැසීමට සකස් කර ඇති කානු පද්ධතියෙහි ධාරිතාව වැඩි කර කානු පද්ධතිය තුළ සවි කර ඇති දුරකතන රැහැන්, කානු ජලය බැස යෑමට බාධාවක් නොවන පරිදි සුදුසු වෙනත් ස්ථානයක සවි කිරීමටත්, රවුම් පාරේ මැද කොටසේ සිට හන්දයාවත්ත ප්‍රදේශය හරහා පාදිලියාවත්ත පාර ඔස්සේ නූපේ ඇළ දක්වා ජලය බැස යෑමට දැනට පවතින කානු පද්ධතියේ ධාරිතාව වැඩි කර අවහිරතා ඉවත් කර සකස් කිරීමටත් කටයුතු කෙරෙනු ඇත. එමෙන්ම ඉඩම පිළිබඳ අවසන් ගම්සභා සිතියම ගැනීමෙන් අනතුරුව එම ඉඩම හරහා ස්වභාවික ඇළ මාර්ගය තිබුණේද නැද්ද යන්න තීරණය කිරීමට නියමිතය.
මේ අතර නිල්වලා ගඟ හරහා ඉදිකර ඇති ලවණ බාධකය හේතුවෙන් මතුව ඇති ගැටලු සඳහා දීර්ඝ කාලීන විසඳුම් දීමට පේරාදෙණිය විශ්වවිද්‍යාලයෙන් අධ්‍යයනයක් සිදු කිරීමට ආරම්භ කර ඇති ක්‍රියාවලිය යළි සමාලෝචනයට ලක් කර සලකා බැලීමට ද තීරණය කර තිබේ.
