සමේ රෝගයකට සහ දත් අමාරුවකට ප්‍රතිකාර ගැනීමට මීගමුව රෝහලේ බාහිර රෝගී අංශයට ගිය අවස්ථාවේදී වෛද්‍යවරයකු විසින් ලිංගික අතවරයට ලක් කළ බව කියන තරුණිය වෛද්‍ය මණ්ඩලයක් හමුවට ඉදිරිපත් කර වාර්තාවක් ලබාගැනීමට මීගමුව මහේස්ත්‍රාත් අධිකරණයෙන් පොලීසිය නියෝගයක් ලබාගෙන තිබේ.
ඇයව පරීක්ෂා කළ අධිකරණ වෛද්‍යවරයා විසින් ඇයට ලිංගික අතවරයක් සිදුව නැති බවට ලබාදී ඇති වාර්තාව සම්බන්ධයෙන් ඇය සෑහීමකට පත් නොවීම හේතුවෙන් වෛද්‍ය මණ්ඩලයක් හමුවට ඇය ඉදිරිපත් කිරීම සඳහා අධිකරණ නියෝගයක් ලබාගැනීමට සිදුවූ බව මීගමුව සහකාර පොලිස් අධිකාරී ගාමිණි රත්නායක මහතා සඳහන් කළේය.
අවුරුදු 19ක් වන මෙම තරුණිය සමේ රෝගයක් හේතුවෙන් ප්‍රතිකාර ලබා ගැනීමට මීගමුව රෝහල වෙත ගොස් ඇත්තේ පසුගිය මාර්තු 31 වැනිදාය. ඇය රෝහලට ගොස් ඇත්තේ ඇයගේ මව සමඟ බව ද සඳහන්ය. සමේ රෝගය පරීක්ෂා කරන අතරතුර වෛද්‍යවරයා ලිංගික අතවර කළ බවට ඇය මීගමුව පොලිසියට පැමිණිල්ලක් කර ඇත්තේ මීගමුව මහරෝහලේ අධ්‍යක්ෂවරයා මඟින් පසුගිය 2දාය.
මේ සම්බන්ධයෙන් අධිකරණයට ද කරුණු වාර්තාකර ඇත. පොලීසිය ඒ අනුව අධිකරණ වෛද්‍යවරයා හමුවට ඉදිරිපත්කර තිබේ. ඇය ප්‍රතික්ෂේපකර ඇත්තේ එම අධිකරණ වෛද්‍ය වාර්තාවය. ඇය පොලීසියට පැමිණිලිකර ඇති ආකාරයට අනුව අතවරයට ලක්ව ඇත්තේ රෝහල තුළදීය. වෛද්‍යවරයාට එරෙහිව ඇය පොලීසියට පැමිණිල්ල කළ දින සිට වෛද්‍යවරයාද සේවයට වාර්තාකර නැති බව පොලීසිය සඳහන් කරයි. ප්‍රකාශයක් ලබාදීමට පැමිණෙන ලෙස වෛද්‍යවරයාට දැනුම්දීම් කිහිපයක් කර ඇතත් ඔහු පොලීසිය මඟ හැර සිටින බව මීගමුව පොලීසිය සඳහන් කරයි.
වෛද්‍යවරයා අවුරුදු 47ක් වයසැති මාරවිල පදිංචිකරු‍ෙවකි. මීගමුව රෝහලේදී 2007 වසරේ නොවැම්බර් 12 දින වෛද්‍යවරයෙක් විසින් රෝගී තරුණියක් දූෂණය කර රෝහල් ගොඩනැඟිල්ලෙහි 06 වැනි මහලේ සිට බිමට දමා ඝාතනය කර තිබිණි. සීමාවාසික වෛද්‍යවර‍ෙයක් වූ එම වෛද්‍යවරයා විසින් එසේ දූෂණය කර මරා දැමුවේ මොනරාගල දඹගල්ලේ පදිංචිකාරියක් වූ 22 හැවිරිදි වියැති ඇඟලුම් කම්හල් සේවිකාවකි.
එම වෛද්‍යවරයාට එරෙහිව වසර 07ක් තිස්සේ පැවැති නඩු විභාගයකින් අනතුරුව මීගමුව මහාධිකරණය විසින් මරණ දඬුවම නියම කරනු ලබන්නේ 2014 වසරේ සැප්තැම්බර් 03 වැනිදාය.
