වැලිකඩ පොලිස් අත්අඩංගුවේ සිටි තරුණයකු සැක කටයුතු ලෙස මිය යෑම සම්බන්ධයෙන් වැඩබලන පොලිස්පති නීතිඥ ප්‍රියන්ත වීරසූරිය මහතාගේ නියෝගයෙන් අපරාධ පරීක්ෂණ දෙපාර්තමේන්තුව විමර්ශනයක් ආරම්භ කර තිබේ.
බදුල්ල මීගහකිවුලේ පදිංචි සත්සර නිමේෂ් නමැති 25 හැවිරිදි වියේ පසුවන තරුණයා සැකකටයුතු ලෙස මියගොස් ඇත්තේ පසුගිය 01 වැනිදා වැලිකඩ පොලීසියේ නිලධාරීන් කණ්ඩායමක් අත්අඩංගුවට ගැනීමෙන් අනතුරුවය. වැලිකඩ පොලිස් වසමේ නාවල ප්‍රදේශයේ නිවෙසකට ඇතුළු වී සිටියදී මෙම තරුණයා වැලිකඩ පොලීසිය අත්අඩංගුවට ගෙන ඇත්තේ නිවැසියන් සහ ප්‍රදේශවාසීන් කළ දැනුම්දීමකට අනුව බව පොලිස් මාධ්‍ය කොට්ඨාසය සඳහන් කරයි.
පොලිස් ස්ථානයට රැගෙන ආ පසු මෙම තරුණයා කලහාකාරී ලෙස හැසිරීම හේතුවෙන් ඔහුව මුල්ලේරියාව රෝහලට ඇතුළත් කිරීමට කටයුතු කළ බව පොලීසිය සඳහන් කරයි. එසේ රෝහල් ගත කළ තරුණයා පසුගිය 02 වැනිදා මියගොස් ඇත. පොලීසිය සඳහන් කරනු ලබන්නේ ඔහු මානසික රෝගී තත්ත්වයකින් පෙළුණු බැවින් මුල්ලේරියාව රෝහලට ඇතුළත් කිරීමට පියවර ගත් බවය.
සිරකරු අයිතිවාසිකම් සුරැකීමේ කමිටුවේ විධායක අධ්‍යක්ෂ නීතිඥ සේනක පෙරේරා මහතා සඳහන් කරනු ලබන්නේ මෙම තරුණයා පොලිස් අත්අඩංගුවේ සිටියදී විවිධ වධහිංසාවලට ලක්වූ බව ඔහුගේ මවගේ සහ අනෙකුත් තොරතුරු අනුව හෙළිදරව් වන බවය. මව පොලීසියට පැමිණෙන විට එතකොට ශරීරය රෝහලට අරන් ගිහින් ඉවරයි. තවදුරටත් සොයා බැලීමේදී ඒ තරුණයා ඇඳගෙන හිටිය ඇඳුම පවා පොලීසිය හංගලා. ඩෙනිම කුණු කූඩයකට දාලා. ඒ තරුණයා භාවිත කළ දුරකතනය විනාශ කරන්න කටයුතු කරලා තියෙනවා. මේ සෑම සිද්ධියකින්ම තේරෙන්නේ, යම් දෙයක් හංගන්න උත්සහ කරපු බවයි. සියදිවි නසාගැනීමක් කියලා තමා පොලීසිය අම්මාට කියලා තියෙන්නේ, යැයිද සේනක පෙරේරා මහතා සඳහන් කරයි.
මෙසේ මියගොස් ඇති තරුණයා මෙම සිදු වීමට මුහුණ දී ඇතැයි පැවසෙන්නේ බෝඩිමක් සොයා යමින් සිටියදී බව සඳහන්ය. මෙම තරුණයාව ත්‍රීවීල් රථයකින් පිරිසක් හඹාවිත් ඇති බවත් එහිදී ආරක්ෂාවට නිවෙසකට රිංගා ඇති බවටත් විවිධ කථාබහ පවතී. එම අවස්ථාවේදී නිවැසියන් මෙම තරුණයා සොරෙක් යැයි සිතා අල්ලා පොලීසියට භාරදී ඇති බව පොලීසිය පාර්ශ්වයෙන් කිය වෙන්නේය. පෞද්ගලික රැක බලාගැනීම පිළිබඳ පාඨමාලාවක් කොළඹ හදාරමින් සිටි මෙම තරුණයා සම්බන්ධයෙන් කිසිදු අපරාධමය චෝදනාවක් නොමැති බවද මේ වන විට තහවුරු වී ඇත. මෙම තරුණයා පොලිස් ස්ථානයට රැගෙන ආ අවස්ථාවේදී සිර මැදිරියේ 16 දෙනකු සිට ඇති බවත් ඒ අය ඇතුළු 30 දෙනෙකුගෙන් මේ සම්බන්ධයෙන් ප්‍රකාශ ලබාගෙන ඇති බවත් නුගේගොඩ කොට්ඨාසය භාර ජ්‍යෙෂ්ඨ පොලිස් අධිකාරී මංගල දෙහිදෙණිය මහතා සඳහන් කළේය. ඒ කිසිවෙකුත් පොලිස් පහරදීමක් මෙම තරුණයාට සිදු වූ බව පවසන්නේ නැතැයි ද මංගල දෙහිදෙණිය මහතා පැවසීය. එහෙත් මෙම සිදුවීම සම්බන්ධයෙන් වැලිකඩ පොලීසියේ වගකිවයුතු නිලධාරීන් කටයුතු කර ඇති ආකාරය ගැන ගැටලුවක් පවතින බවත් එම නිලධාරීන්ට එරෙහිව පියවර ගන්නා බවත් මංගල දෙහිදෙණිය මහතා පැවසීය.
මෙම තරුණයා පොලිස් ස්ථානයට රැගෙන ඒමෙන් පසු නොසන්සුන් ලෙස හැසිරී ඇති බව වැලිකඩ පොලීසිය සඳහන් කරයි. ඔහු බිත්තිවල හැප්පෙමින් බිම පෙරලෙමින් නොසන්සුන්ව හැසුරුණු බවත් ඒ හේතුව නිසා මුල්ලේරියාව රෝහලට රැගෙන ගොස් ඇතුළත් කිරීමට පියවර ගත් බවත් පොලීසිය සඳහන් කරයි. මෙම මරණය සම්බන්ධයෙන් ශ්‍රී ලංකා නීතිඥ සංගමයද පෙරේදා (05) දැඩි කනස්සල්ල පළ කරමින් නිවේදනයක් නිකුත් කරනු ලැබීය. වැලිකඩ පොලිස් අත්අඩංගුවේ සිටියදී මෙසේ සැක කටයුතු ලෙස මියගිය පළමු පුද්ගලයා මෙම තරුණයා පමණක් නොව. ප්‍රබල සම්බන්ධකම් ඇති ප්‍රසිද්ධ කාන්තාවකගේ නිවෙසේ සිදු වූ රන් භාණ්ඩ සොරකමක් සම්බන්ධයෙන් වැලිකඩ පොලීසිය මඟින් අත්අඩංගුවට ගත් නිවෙසේ මෙහෙකාරියද 2023 වසරේ මැයි මාසයේදී ඝාතනය වන්නේ වැලිකඩ පොලිස් අත්අඩංගුවේ සිටියදී පොලිස් පහරදීමකිනි.
පොලිස් පහරදීමෙන් පසු ඇගේ සිරුර කොළඹ ජාතික රෝහලට රැගෙන ගොස් භාරදෙනු ලබන්නේ මහමඟ වැටී සිටියදී හමුවූ කාන්තාවක් පොලීසිය භාර දෙන ආකාරයෙනි. එම කාන්තාවත් බදුල්ලේ තැනැත්තියක් වන අතර ඇය දෙමෝදර පදිංචිකාරියක වූවාය. වැලිකඩ පොලීසිය තුළදී ඇයට පොලීසියේ නිලධාරීන් අමානුෂික ලෙස පහරදී ඝාතනය යටපත් කිරීමට එකල දේශපාලන බල අධිකාරියද දැඩි වෙහෙසක් ගනු ලැබීය. සමාජ විරෝධය හමුවේ අපරාධ පරීක්ෂණ දෙපාර්තමේන්තුවට විමර්ශන භාර දෙනු ලැබීමත් සමඟ පොලිස් පහරදීමකින් එම මරණය සිදු වූ බව තහවුරු කරනු ලැබීය.
පොලිස් විශේෂ විමර්ශන ඒකකයද ඒ සම්බන්ධයෙන් විමර්ශනයක් ආරම්භ කරනු ලැබූ අතර එහිදී අනාවරණය වූයේ වැලිකඩ පොලීසියේ නිලධාරීන් එම කාන්තාවට එසේ අමානුෂික ලෙස පහර දෙමින් මිලේච්ච ලෙස හැසිරී ඇත්තේ දේශපාලන වශයෙන් ඔවුන්ට එල්ලවූ පීඩනය හේතුවෙන් බවය.
