මියන්මාර භූ කම්පනයේ බලපෑමෙන් තායිලන්තයේ බැංකොක් නුවර මහල් 33කින් සමන්විත අතිවිශාල ගොඩනැඟිල්ල මුළුමනින්ම විනාශ වීම සම්බන්ධව විධිමත් පරික්ෂණයක් පැවැත්වීමට එරට අගමැතිනිය පයිටොංග්ටාන් ෂිනවේට්රා නියෝග කර ඇතැයි විදෙස් මාධ්‍ය වාර්තා කරයි. මීටර් 137ක් උසැති වැඩ නිම නොකළ එම ගොඩනැඟිල්ල භූ කම්පනයේ බලපෑමෙන් තායිලන්තයේ විනාශ වූ එකම ගොඩනැඟිල්ල බැවින් එහි ඉදි කිරිමේ ප්‍රමිතිය සම්බන්ධව ගැටලුසහගත තත්ත්වයක් මතු වී ඇතැයි ද විදෙස් මාධ්‍ය වැඩිදුරටත් වාර්තා කරයි.
චීන ඉංජිනේරු සමාගමක් විසින් ඉදිකිරීම් භාරව සිටි එම ගොඩනැඟිල්ල බිඳවැටෙන විට එහි 100කට අධික සේවකයන් සේවයේ නිරතව සිටි බවත්, 19 දෙනකුගේ මළසිරුරු සොයා ගනු ලැබුවද, තවත් 75 දෙනකු ගොඩනැඟිලි සුන්බුන් අතරට මිහිදන් වූ බවට අනුමාන කරන බවත් විදෙස් මාධ්‍ය සඳහන් කරයි. හදිසි ආපදා නියාමන උල්ලංඝනය කරමින් බිඳ වැටුණු ගොඩනැඟිල්ලේ සුන්බුන් අතරින් ලිපිලේඛන තොගයක් රැගෙන යෑමට උත්සාහ කළ බව කියන එහි ඉදිකිරීම් බාරව සිටි ඉංජිනේරු සමාගමේ නිලධාරීන් සිවුදෙනකු තායිලන්ත පොලිසිය විසින් අත්අඩංගුවට ගෙන ඇති අතර, ඉදිකිරිම් සඳහා භාවිත කළ උපකරණ සහ ද්‍රව්‍ය තත්ත්ව පරීක්ෂාවකට ලක් කිරීමට තායිලන්ත කර්මාන්ත අමාත්‍යාංශය පියවර ගෙන ඇතැයි වාර්තා වේ.
