ශ්‍රී ලාංකීය බෞද්ධ අධ්‍යාපනයේ මුදුන් මල්කඩ බඳු වූ කොළඹ ආනන්ද විද්‍යාලය සහ දමිළ සහජීවනයේ පුනරුදය වූ යාපනය හින්දු විද්‍යාලය අතර වර්ෂිකව පැවැත්වෙන ක්‍රීඩා සැණකෙළිය මෙවරත් අප්‍රේල් මස 04 වැනිදා කොළඹ ආනන්ද විද්‍යාලය මූලික කරගෙන පැවැත්වීමට සියලු කටයුතු සංවිධානය කර තිබේ.
කාලාන්තරයක් පුරාවට අපට අමතක වූ සොඳුරු සහෝදරත්වයේ මතක අලුත් කරනු වස් යාපනය හින්දු විද්‍යාලය සහ කොළඹ ආනන්ද විද්‍යාලය අතර සහෝදරත්වයේ පාලම ඉදිකිරීම ඇරඹුවේ 2012 දීය. එය කොළඹ ප්‍රධාන සිංහල බෞද්ධ පාසලක් වන ආනන්ද විද්‍යාලය, සිය 125 වැනි සංවත්සර සැමරුමට සමගාමීව ජාතීන් අතර සංහිඳියාව ප්‍රායෝගිකව සිය ශිෂ්‍ය ප්‍රජාව වෙත සමීප කිරීමේ මහඟු කර්තව්‍යයට පිඹුරු පත් සැකසීමක් වශයෙනි.එක් වසරකදී කොළඹදී පැවැත්වෙන මෙම ක්‍රීඩා සැණකෙළිය ඊළඟ වර්ෂයේදී පැවැත්වෙන්නේ යාපනයේදීය.
උතුරත් කොළඹත් අතර මිතුදම් අගයන “වී ටී එස් සිව ගුරුනාදන් අනුස්මරණ කුසලාන ක්‍රිකට් තරගාවලිය” මෙවර, කොළඹ කෝල්ඩ්ස් ක්‍රීඩා සමාජ (Colombo Colts Cricket Club) ක්‍රිකට් පිටියේදී පැවැත්වීමට නියමිතයි.
වී ටී එස් සිවගුරුනාදන් යාපනය හින්දු විද්‍යාලයේ කීර්තිමත් ආදි ශිෂ්‍යයෙකි. එමෙන්ම ඔහු 1916 වසරේ සිට 1942 වසර දක්වා ආනන්දයේ සේවය කළ ආනන්දනීය ගුරුවරයෙකි. ශිෂ්‍යයෙකු මෙන්ම ගුරුවරයකු ලෙසත් විද්‍යාල දෙකේම නාමයන් කීර්තියෙන් බැබලූ මේ වියතාණන් සිහි කරනු වස් මෙම තරගාවලිය මූලිකව ආරම්භ විය.
මෙවර තරගාවලිය කොළඹ ආනන්ද විද්‍යාලීය ආදි ශිෂ්‍ය සංගමය සංවිධානය කරන අතර එය ක්‍රිකට් තරඟයකින් පැසි පන්දු තරගයකින්, චෙස් තරගයකින් සහ ඉංග්‍රීසි මාධ්‍ය විවාද තරඟයකින් සමන්විත වෙයි.
මේ ක්‍රීඩා සැණකෙළිය සඳහා නව මුහුණුවරක් එක් කරමින් විදුහල් දෙකේම ආදි ශිෂ්‍යයන් සහභාගී වන ක්‍රිකට් තරගයක්ද පැවැත්වීමට කටයුතු සංවිධානය කර ඇත.ආනන්ද විද්‍යාලයෙන් එදා මෙදා තුර බිහිකළ විශිෂ්ටතම ක්‍රීඩානායකයෙකු සහ ක්‍රීඩකයෙකු වන අර්ජුන රණතුංග මහතාට ගෞරවයක් වශයෙන් “අර්ජුන රණතුංග අභියෝගතා කුසලාන තරගය” ලෙස එම තරගය නම්කර තිබීම විශේෂත්වයකි.
මේ හරහා පාසලෙන් නික්මුණු තරුණ හදවත් වලට සාමය සංහිඳියාව තුළ ගැබ්ව ඇති අරුත ළඟා කරවීම සංවිධායක කමිටුවේ අපේක්ෂාවේ. ආනන්ද විද්‍යාලය සහ යාපනය හින්දු විද්‍යාලයේ අතර සහෝදරත්වයේ අත්වැල බෙදී වෙන් වන්නට අර අදින රටකට දෙනු ලබන්නේ ඉතා නිවැරදියි යහපත් ආදර්ශයකි.
මීට සමගාමීව පැවැත්වෙන ඉංග්‍රීසි විවාද තරගාවලිය සහ චෙස් තරගාවලිය ආනන්ද විද්‍යාලීය පරිශ්‍රයේදී පැවැත්වෙන අතර පැසි පන්දු තරගාවලිය හෙන්ද්‍රි පෙදිරිස් ක්‍රීඩාංගණයේදී සවස 3.30 සිට පැවැත්වීමට නියමිතයි. දිනය අවසානයේ ජයග්‍රාහකයන්ට කුසලාන සහ තිළිණ ප්‍රදානෝත්සවය ආනන්ද විද්‍යාලයීය කුලරත්න ශාලාවේදී උත්කර්ෂවත් අන්දමින් පැවැත්වීමට බලාපොරොත්තු වේ.
මෙය විදුහල් දෙක අතර පැවැත්වෙන තරගාවලියකටත් වඩා රටේ සමාජ සහජීවනයේ ඉදිරි අනාගතය වෙනුවෙන් වාර්ෂිකව සිදුකෙරෙන කටයුත්තක් ලෙස හඳුන්වාදිය හැකිය. හුදෙක්ම සංවිධායක මණ්ඩලය බලාපොරොත්තු වන ආකාරයට රටේ අනෙක් පාසල් සහ සංවිධාන හරහා මේ ආකාරයේ උත්සව සංවිධානය කිරීමට පෙළඹවීමක් මෙයින් සිදුවන අතර ඒ රටේ අනාගතයේ සුබ සිද්ධියට උපකාරි වෙයි.එකම රටක ජාතිය ආගම භාෂාව යන මේවායෙන් ඇති කරනු ලබන විවිධ වූ විෂමතාවයන්, සන්නිවේදනයට බාධකයක් නොවන බව මේ අපූරු මිත්‍රත්වයෙන් මතු පරපුරට දායක කරනු ලබන සුවිශේෂී පණිවුඩයකි.
සමස්ත වැඩසටහන පිටුපස ඇති අරමුණ වන්නේ සිසුන්ට, ආචාර්ය මණ්ඩලයට, ආදි සිසුන්ට, කාර්ය මණ්ඩලයට සහ දෙමාපියන්ට පසුගිය දශක කිහිපය තුළ ගොඩනැගී තිබූ ශාරීරික හා මානසික බාධක ඉක්මවා යාමට අවස්ථාවක් නිර්මාණය කරමින් ,අවසානයේ අන්තර් වාර්ගික සමගිය සඳහා ආදර්ශයක් සැපයීමයි.
