ශ්‍රී ලංකා ක්‍රිකට් ආයතනය සංවිධානය කරන නැෂනල් සුපර් ලීග් (එන්එස්එල්) සිවුදින ක්‍රිකට් තරගාවලියේ මූලික වටයේ තරග දෙකක් අද ආරම්භ වෙයි.
එහිදී යාපනය සහ ගාල්ල කණ්ඩායම් හම්බන්තොට මහින්ද රාජපක්ෂ ක්‍රීඩාංගණයේදීත්, මහනුවර සහ දඹුල්ල කණ්ඩායම් කොළඹ ආර්. ප්‍රේමදාස ක්‍රීඩාංගණයේදීත් තරග බිමට පිවිසෙයි.
මේ කණ්ඩායම් අතරින් අද ආරම්භ වන තරගය මහනුවර කණ්ඩායමට තීරණාත්මක වී තිබේ. මේ වනවිට ප්‍රසාද ලකුණු සටහනේ තෙවැනි තැන පසුවන මහනුවර පිල මූලික වටයේ ක්‍රීඩා කරන අවසන් තරගය මෙයයි. මේ තරගාවලියේ මූලික වටය අවසානයේ ප්‍රසාද ලකුණු සටහනේ පෙරමුණ ගන්නා කණ්ඩායම් දෙක අවසන් තරගයට එක්වන අතර, මේ වනවිට ගාල්ල සහ දඹුල්ල පිළිවෙළින් පළමු සහ දෙවැනි ස්ථාන අත්කරගෙන තිබේ.
මහනුවර පිල තෙවැනි තැන සිටිද්දී කොළඹ සහ යාපනය පිළිවෙළින් සිවුවැනි සහ 5 වැනි තැන්වල රැඳී සිටියි. කෙසේ වෙතත් ගාල්ල, දඹුල්ල සහ යාපනයට අද තරගවලට අමතරව තවත් තරගය බැඟින් ඉතිරිව ඇති අතර, කොළඹ පිලටත් තවත් තරගයක් ඉතිරිව තිබේ.
මේ වනවිට තරගාවලියේ ලකුණුලාභීන් අතර පෙරමුණ ගැනීමට යාපනය කණ්ඩායමේ රවිඳු රසාන්ත සමත්ව ඇත්තේ ලකුණු 423ක් රැස්කරමිනි. යාපනය පිලේ කමිල් මිෂාර (366) සහ කොළඹ පිලේ අවිශ්ක ප්‍රනාන්දු (293) දෙවැනි සහ තෙවැනි තැන්වල සිටිති.
දඹුලු පිලේ අකිල ධනංජය තරග දෙකකදී කඩුලු 22ක් බිඳ දමමින් කඩුලුලාභීන් අතර පෙරමුණේ පසු වෙද්දී චමිඳු වික්‍රමසිංහ (මහනුවර) සහ නිශාන් පීරිස් (කොළඹ) කඩුලු 11 බැඟින් දවා ගෙන සිටිති.
නිරෝෂාන් ප්‍රියංකර
