හැව්ලොක් ක්රීඩා සමාජය සමඟ කරට කර සටනක නිරත වූ සීආර් ඇන්ඩ් එෆ්සී ක්රීඩා සමාජය ලකුණු 25-24ක සියුම් ජයක් වාර්තා කරමින් ක්ලිෆර්ඩ් කුසලාන පිළිමලුන් පිටුදැකීමේ රග්බි තරගාවලියේ අවසන් මහා තරගයට සුදුසුකම් ලැබීමට සමත් විය.
සීආර් පිලේ ලකුණු සංඛ්යාවට ගෝල් 2ක්, උත්සාහක දිනුමක් සහ දඬුවම් පහර 2ක් ඇතුළත් වූ අතර, හැව්ලොක් පිල ගෝල් 3ක් සහ දඬුවම් පහරක් වාර්තා කළේය.
දෙපිල අතර හැව්ලොක් පිටියේ ඊයේ පැවති අවසන් පූර්ව තරගය තියුණු මුහුණුවරක් ගත් අතර, තරගයේ පළමු මිනිත්තු 9 ඇතුළත දෙපිලටම ලකුණු රැස්කිරීමට අවස්ථාවක් නොලැබීම කැපී පෙනිණි. අනතුරුව 9 වැනි මිනිත්තුවේදී දඬුවම් පහරක් සාර්ථක කරගත් සීආර් ක්රීඩකයන් ලකුණු 3-0කින් පෙරමුණට ගත්තේය.
පළමු භාගය නිමා වනවිට ලකුණු 15-10කින් පෙරමුණ ගත් සීආර් පිල තරගයේ 60 වැනි මිනිත්තුව වනවිටත් ලකුණු 22-10ක් ලෙස ප්රබල තත්ත්වයක පසුවුවද සිය සුපුරුදු දස්කම් අතරට පිවිසි හැව්ලොක් ක්රීඩකයන්ගෙන් අවසන් මිනිත්තු කිහිපයේදී සීආර් පිලට දැඩි අභියෝගයක් එල්ල විය.
තරගයේ 77 වැනි මිනිත්තුවේදී චතුර ඩිල්ෂාන් තැබූ උත්සාහක දිනුම සංදේශ් ජයවික්රම විසින් ගෝලයක් බවට පත්කරනු ලැබීමත් සමඟ ලකුණු සංඛ්යාව 24 දක්වා ඉහළ දමාගත් හැව්ලොක් පිල දෙපිල අතර ලකුණු පරතරය එක් ලකුණකට අඩුකරගත්තේය. එහෙත් අවසන් මිනිත්තු කිහිපයේදී සිය ජයග්රහණය රැක ගත් සීආර් ක්රීඩකයන් ලබන 6 වැනිදා මහනුවර පිලට එරෙහිව ක්ලිෆර්ඩ් කුසලාන අවසන් මහා තරගයේ සිය ස්ථානය තහවුරු කර ගැනීමට සමත් විය.
ෆවුස් මොහොමඩ්