ගමට ඒමට නිසි මාර්ගයක් නොමැති වීම හේතුවෙන් ගමේ අයෙකු රෝගී වූ විට රෝගියා කඳක බැඳ උස්සාගෙන කිලෝමීටර් දෙකක් පමණ දුරක් රෝහල වෙත යෑමට සිදුව ඇතැයි මීගහකිවුල ප්‍රාදේශීය ලේකම් කොට්ඨාසයට අයත් ඉලුක්තැන්න ගම්වාසීහු පවසති.
මීගහකිවුල, නගරය පේන තෙක් මානයේ පිහිටි ඉලුක්තැන්න ගම්මානයේ මේ වන විට හතළිහකට ආසන්න පවුල් සංඛ්‍යාවක් ජීවත් වෙති.
මීගහකිවුල පශු වෛද්‍ය නිලධාරී කාර්යාලයට පිවිසෙනුයේද මෙම මාර්ගය ඔස්සේ පැමිණීමෙනි.
ඉලුක්තැන්න ගමට ඒමට ඇති මෙම එකම මාර්ගය කැඩී බිඳී සෝදාපාළුවට ලක් වීම හේතුවෙන් ඉලුක්තැන්න ගම්වාසීහු දැඩි ප්‍රවාහන දුෂ්කරතාවයකට මුහුණ දී සිටිති.
අදින් වසර 30 – 40 කට පෙර පස් කපා සකස් කළ මාර්ගය තවමත් පවතින්නේ අඩි පාරක තත්ත්වයේ බවද ගම්හු පවසති.
පස් කපා සකස් කරන ලද මාර්ගය ද පැති කානු, බෝක්කු ආදිය නොමැති වීම හේතුවෙන් මේ වන විට ගල් ගොඩක් බවට පත්ව ඇතැයි ජනතාව පවසති. අධික බෑවුමක් සහිත මාර්ගය මෙලෙස සෝදාපාළුවට ලක්ව ගල් පෑදීම හේතුවෙන් එහි පාගමනින් පවා යෑමට නොහැකි තත්ත්වයක් උද්ගතවී ඇත.
මෙම තත්ත්වය මත මීගහකිවුල නගරය වෙත ඒම සඳහා ඉලුක්තැන්න ගම්වාසීන්ට තම බඩුමුට්ටු හිස තබාගෙන කිලෝමීටර් දෙකකට ආසන්න දුරක් පාගමනින් ඒමට සිදුව ඇත.
පාසල් සිසුන්ටද පාගමනින් පාසල් වෙත යෑමට සිදුව ඇත. මෙම තත්ත්වය හේතුවෙන් ගමේ අයෙකු රෝගී වූ විට ත්‍රීවීල් රථයක් පවා ගෙන්වාගත නොහැකි අතර, රෝගියා කඳක බැඳගෙන රෝහල වෙත ගෙන යෑමට සිදු වන බවද ගම්හු පවසති.
බලයට පත් වූ සෑම රජයකින්ම මාර්ගය සකස් කරන ලෙස ඉල්ලා සිටියත් එය තවමත් ඉටුවී නැතැයි ද ගම්හු පවසති.
ගමට ඒමට ඇති එකම මාර්ගයේ කිලෝමීටර් දෙකක් පමණ වන කොටස කොන්ක්‍රීට් අතුරා පිළිසකර කර දෙන්නැයි ඉලුක්තැන්නේ ගම්හු රජයෙන් ඉල්ලති.
මීගහකිවුල සමූහ – එන්. නවරත්න
