මංමුළා වී සිටි වලස් පැටියකු හොරොව්පොතාන, කිව්ලේකඩ පිහිටා ඇති හුරුළු රක්ෂිතයේ සිටියදී පෙරේදා (01) උදෑසන කහටගස්දිගිලිය වනජීවී නිලධාරීන් පිරිසක් විසින් සොයාගෙන ඇත.
මෙලෙස හමුව ඇති වලස් පැටවා මාස එකහමාරක් පමණ වන බවත් උස අඟල් 18ක් පමණ වන බවත් වනජීවී නිලධාරීහු පවසති.
මෙම වනජීවී නිලධාරීන් පිරිස සිය රාජකාරි කටයුත්තක් සඳහා හුරුළු රක්ෂිතයේ ගමන් කරමින් සිට ඇත. මවගෙන් මඟහැරුණු මෙම වලස් පැටියා එහිදී අතරමං වී සිට ඇති බව වනජීවී නිලධාරින්ට නිරීක්ෂණය වී ඇත. ඒ අනුව එම නිලධාරීන් මෙම වලස් පැටවා ආරක්ෂිතව රැගෙනවිත් ඇත.
අනතුරුව වලස් පැටවා අනුරධපුර පණ්ඩුලගම වනජීවී පසු වෛද්‍ය නිලධාරීන්ගේ පරීක්ෂාවට යොමු කිරීමට මෙම නිලධාරීන් කටයුතු කර ඇත. එහිදී වලස් පැටවාගේ සෞඛ්‍ය තත්ත්වය පිළිබඳව පරීක්ෂා කිරීමට නියමිතව තිබූ බව කහටගස්දිගිලිය ස්ථාන භාර වනජීවී නිලධාරි එම්.ඒ.කේ.එස්. දිසානායක මහතා පැවැසීය.
කැබිතිගොල්ලෑව සමූහ – එස්.ජී. උබේපාල
