කැනඩාවේ, ඔටාවා අගනුවර හිල්ඩා ජයවර්ධනාරාමාධිපති, කැනඩාවේ බෞද්ධ කොංග්‍රසයේ සභාපති, නුගේගලයායේ ජිනානන්ද හිමිපාණන් වහන්සේගේ සංකල්පයක් මත ක්‍රියාත්මක වන ප්‍රජා සත්කාරක සේවාවට සමගාමීව දිළිඳු පවුල් සඳහා නිවාස ඉදි කර දීමේ ව්‍යාපෘතිය තුළ ඉදි කරන ලද 18 වැනි නිවෙස සෙවණගල කිරිවැව අංක 190/B ඇළ පාර, නුගේගලයාය යන ලිපිනයේ පදිංචි ඉතාම දිළිඳු දරු තිදෙනෙකුගෙන් යුත් පවුලක් වන කේ. පී. අසංක යන අය වෙත ඉකුත් 30 වැනිදා උත්සවාකාරයෙන් භාර දෙනු ලැබීය.
රුපියල් ලක්ෂ 20කට ආසන්න මුදලක් වැය කර ඉදි කරන ලද ඉහත නිවෙස සඳහා පූර්ණ මූල්‍ය දායකත්වය ලබා දී ඇත්තේ ජිනානන්ද හිමිපාණන් වහන්සේගේ අනුශාසනා මත අමෙරිකාවේ ෆ්ලොරීඩා ප්‍රාන්තයේ, වෙස්තාම් බීච් නගරයේ පදිංචි ඌශා ගුණසේකර මහත්මිය විසිනි. ඌශා මහත්මියගේ දයාබර මවුපියන් වන බී.එස්. විජේරත්න හා සෝමා විජේරත්න යන දෙපොළට පින් පිණිස ඉහත නිවෙස ඉදි කර දී ඇත. එදින දහවල සඟසතු දානමය පින්කමක්ද පවත්වන ලදි.
මෙම අවස්ථාවට ජිනානන්ද හිමියන් ඇතුළු මහා සංඝරත්නය ද අමෙරිකාවේ සිට පැමිණි ඌශා මහත්මිය හා නිරූපමා සිංහභාහු, සෙලින්කෝ රක්ෂණ සමාගමේ අධ්‍යක්ෂ චානක විමලසූරිය, චන්දාසිරි සේදරසෙට්ටි, බී.ජේ. විජේසිංහ යන මහත්ම මහත්මීන් හා ප්‍රදේශවාසීන් විශාල පිරිසක්ද එක්ව සිටියහ. ජිනානන්ද හිමිපාණන් වහන්සේගේ සොහොයුරියක් වන ඩබ්ලිව්. ශ්‍රීයාකාන්ති මහත්මියගේ මඟපෙන්වීම හා ඉල්ලීම මත ඉහත නිවෙස මෙම පවුලට ඉදි කර දී තිබිණ.
ඇඹිලිපිටිය – සේන වී. ගමගේ
