ආණ්ඩුවේ අලුත්ම ප්‍රතිපත්තිය වෙලා තියෙන්නේ වැඩියෙන්ම කෑගහන කට්ටිය හිරේ යවන එක. දැන් චාමර සම්පත් හිරේ. මට නම් ඕක ප්‍රශ්නයක් නෑ. මාව දානකම් බලාගෙන ඉන්නේ. මට හිරගෙදරත් එකයි, රජ ගෙදරත් එකයි. හැබැයි මේ කට්ටියට වැරදිලා තියෙන්නේ අපි ඒ ජීවිතේ තේරුම් ගත්තේ නෑ කියලා හිතන් ඉන්න එකයැයි ශ්‍රී ලංකා පොදුජන පෙරමුණේ ජාතික සංවිධායක පාර්ලිමේන්තු මන්ත්‍රී නාමල් රාජපක්ෂ මහතා පවසයි.
ඔහු මේ බව කියා සිටියේ පළාත් පාලන මැතිවරණය සඳහා බදුල්ල දිස්ත්‍රික්කයට තරග වදින අපේක්ෂක අපේක්ෂිකාවන් දැනුම්වත් කිරීමට බදුල්ල Òරිවර්සයිඩ්Ó හෝටලයේ පෙරේදා (01) පැවැති ජන හමුවකට එක්වෙමිනි.
එහිදී මන්ත්‍රීවරයා මෙසේද පැවසීය.
“අපි ගම කේන්ද්‍ර කරගෙන ගොඩනැගුණු දේශපාලන බලවේගයක්. අපේ කඳවුර හැමදාම ගම විශ්වාස කළා. සිරිමාවෝ බණ්ඩාරනායක මැතිනියගෙන් පටන් ගත්තාම අපි දේශපාලන ව්‍යාපාරය කළේ එහෙම. මගේ පියා ජනපති කාලයේ ගම නැඟුම, දිවි නැඟුම ආදී සියල්ලෙන්ම අපි අවධානය යොමු කළේ ගමේ ආර්ථිකය ශක්තිමත් කරන්න. අපි රටට වැඩ කළ දේශපාලන පක්ෂයක්. අපි බොරු කියලා බලයට ආපු අය නොවෙයි. බොරුවෙන් අපිව පරාජය කළා. හැබැයි අපි නැවත ජයග්‍රහණය ලබා ගන්න බොරු කිව්වේ නැහැ. අපි පළිගන්නෙත් නෑ. වෛරී දේශපාලනය අපි කරන්නෙත් නෑ. අපි ප්‍රතිපත්ති එක්ක දේශපාලනයක් කරන්නේ. ඒ නිසා මම විශ්වාස කරනවා තමුන්නාන්සේලා තමන්ගේ කොට්ඨාසයට ප්‍රාදේශීය සභා බල ප්‍රදේශයේ දිස්ත්‍රික්කයේ ආසනයේ දේශපාලනය කරන කොට වෛරය, කුහකත්වය, ඉරිසියාව නැතිව තමන්ගේ මැතිවරණ ව්‍යාපාරය මෙහෙයවයි කියා හිතනවා. අපට අපේක්ෂකගේ පෞද්ගලික ජීවිතය අදාළ වෙන්නේ නෑ. අපි පක්ෂයක් විදිහට අපේ ප්‍රතිපත්ති මොනවාද අපි ගමට ගෙන යන පණිවිඩය මොකක්ද ඒ තමයි අපි ගම ගොඩනඟන්න හදන වැඩ පිළිවෙළ මොකක්ද කියන එක. වර්තමාන ආණ්ඩුව කියන්නේ ප්‍රාදේශීය සභා බලය නැති නිසා වැඩ කරන්න විදියක් නෑ කියලා. අපි 2018 දී ලංකාවේ බහුතර ප්‍රාදේශීය සභා ජයග්‍රහණය කරන කොට අපිට ජනාධිපතිවරයෙක් හිටියෙත් නෑ. විපක්ෂ නායකකම තිබ්බෙත් නෑ. ආණ්ඩුව තිබ්බෙත් නෑ. පාර්ලිමේන්තුවේ හිටියේ තිස් ගාණක්.
බදුල්ල සමූහ නිශාන්ත අබේගුණවර්ධන
