1990 මාර්තු මස 25 වැනිදා විවෘත කරන ලද බණ්ඩාරගම සතොස ශාඛා ගොඩනැඟිල්ලේ පවතින අඩුපාඩු රැසක් හේතුවෙන් පාරිභෝගිකයන්ගේ මෙන්ම එහි සේවකයන්ගේ ජීවිත ද දැඩි අනතුරුදායක තත්ත්වයකට පත්ව ඇත.
සතොස ශාඛාවේ වහලයේ දිරාපත් වූ සිවිලිම සමඟ කොයි මොහොතක හෝ හිස මත කඩා වැටී තම ජීවිත සේම පුරා පැය 12කට ආසන්න කාලයක් එම ස්ථානයේම රැඳී සිටිමින් සේවයේ යෙදෙන සේවක සේවිකාවන්ගේ ජීවිත ද මේ හේතුවෙන් මරුවා සමඟ වාසය කිරීමකැයි පාරිභෝගිකයෝ පවසති.
එම ශාඛාවේ වහලයේ අභ්‍යන්තරයේ ස්ථාන ගණනාවක්ම මේ වන විට දැඩි ලෙස අබලන්ව කඩා වැටීමේ අවදානමට ලක්ව ඇත.
බණ්ඩාරගම සෞඛ්‍ය නිලධාරි කාර්යාලය ආසන්නයේම සතොස වෙළෙඳසල පිහිටා තිබෙන බැවින් ගැබිනි මාතාවන් විශාල ප්‍රමාණයක් භාණ්ඩ මිලදී ගැනීම සඳහා පැමිණීමත්, ඊට අමතරව පෝෂණ මලු ලබා ගැනීම සඳහා ගැබිනි මාතාවන් පැමිණීමත් මෙම අනතුරුදායක තත්ත්වය හේතුවෙන් දැඩි අවදානම් තත්ත්වයක් වී ඇත.
තවද වර්ෂා දිනවල මුළු සතොස ශාඛාවම වැසි ජලයෙන් පිරීමෙන් සේවක සේවිකාවන් භාණ්ඩ ආරක්ෂා කර ගැනීමටත්, පැමිණෙන පාරිභෝගිකයන්ට වැසි ජලයෙන් ආරක්ෂා වීමට කුඩයක් ඉහලාගෙන වෙළෙඳ භාණ්ඩ මිලදී ගැනීමටත් සිදුවී ඇති අතර ඇතැම් අවස්ථාවල ලිස්සා ගොස් අනතුරු සිදුවීම හේතුවෙන් දෙපාර්ශ්වයම දැඩි අපහසුතාවට පත්ව ඇත.
මීට අමතරව සතොස ගොඩනැඟිල්ල තුළ සවිකර තිබෙන වායු සමීකරණ යන්ත්‍ර සියල්ල හා විදුලි පංකා එකක් හැරෙන්නට අනෙක් සෑම විදුලි පංකාවක්ම ක්‍රියාවිරහිත වීමෙන් දහවල් කාලය තුළ භාණ්ඩ මිලදී ගැනීම සඳහා සතොසට යාම පෝරුණුවක් තුළට යාම හා සමාන යැයි ද පාරිභෝගිකයෝ පවසති.
අනෙකුත් සුපිරි වෙළෙඳසල් සමඟ තරගයක් ඇතිවන පරිදි හා තවත් සතොස වෙළෙඳසල් සියයකට අධික ප්‍රමාණයක් ආරම්භ කරන බව වගකිව යුතු බලධාරීන් පුරසාරම් දෙඩුවද අය නව වෙළඳසැල් ආරම්භ කිරීමට පෙර බණ්ඩාරගම සතොස මෙන්ම මේ හා සමාන තවත් අඩුපාඩු තිබෙන සතොස වෙළෙඳසල් නවීකරණය කර පාරිභෝගිකයන්ට සතුටින් භාණ්ඩ මිලදී ගත හැකි ස්ථානයක් බවට සහ සේවකයන්ට සතුටින් සේවය කිරීමට හැකි ස්ථාන බවට පත්කරන ලෙස පාරිභෝගිකයෝ වැඩිදුරටත් ඉල්ලා සිටිති.
මේ පිළිබඳ බණ්ඩාරගම සතොස ශාඛාවේ කළමනාකාරවරියගෙන් විමසීමේදී ඇය මෙසේ පැවසුවාය.
“සියලුම අඩුපාඩු පිළිබඳ ඉහළ බලධාරීන්ව ලිඛිතව දැනුම්වත් කර තිබෙනවා. අපට විස්තර දෙන්න බැහැ.”
බණ්ඩාරගම – බිමල් ජයසිංහ
